Дали некогаш сте се запрашале може ли вашето бебе да ја види закачената шарена играчка над креветчето или дали ѕвонењето на вашиот мобилен телефон го вознемирува? Факт е дека бебињата забележуваат и чувствуваат работи комплетно поинаку од возрасните.
Педијатарот Реј Таи објаснува дека бебињата ги користат своите сетила за да ги примат информациите, да реагираат на опкружувањето, да побараат храна и утеха и како би се поврзале со своите родители. Некои сетила, како за допир и за слух во целост се развиени по породувањето. Но, останатите сетила, како за вид, потребно е неколку месеци за да се развијат.
Еве што може да очекувате и што вие како родители можете да направите за да ги поттикнете сетилата кај бебето:
- ВИД
На почетокот, бебето може да гледа само 20 до 30 сантиметри во далечина и неговиот вид е нејасен. Бебето, вели д-р Таи гледа само форми и сенки, без разлика дали нешто е мало или големо, светло или темно. До 4. месец, бебето ќе гледа подалеку и ќе ги користи очите за да следи предмети и лица кои се движат, а до 5. месец ќе има перцепција на длабочина. Помеѓу 4. и 6. месец бебето ќе може да ги види сите бои, а до моментот кога ќе почне да лази и оди ( од 8 до 12 месец), тоа во своето истражување ќе ја користи перцепцијата за длабочина за да разликува оддалеченост.
Што вие можете да направите?
Дезените и боите во детската соба нека бидат во светли и шарени бои. Менувајте ја позицијата на креветчето и менувајте ја позицијата при хранење на бебето, за да му помогнете да ја види околината од различни агли. Шетајте со бебето во различни опкружувања – парк, зоолошка градина, местото каде живеете, а кога нешто ќе му го привлече вниманието, дајте му на бебето време темелно да го проучи.
- СЛУХ
Слухот кај бебето почнува да се развива уште во мајчиниот стомак. Затоа, вели педијатарот д-р Питер Јанг бебето го препознава вашиот глас штом се роди. Сепак, новороденото бебе е почувствително на промени на звукот, па може да се стресе како на пример случне лупање на врата. Но, и покрај нивната чувствителност на промена на звукот, интересно е дека бебињата можат да преспијат и најгласни звуци.
Што вие можете да направите?
“Зборување, читање и пеење на бебето помагаат во градење на карактерот на бебето, поттикнуваат развој на говорот и ја јакнат близината со детето“, вели д-р Таи. Дозволете му на бебето да ужива во секојдневните звуци и опишувајте му што слуша. За бебе кое има проблем со спиење, пробајте “бела бучава“ – звуци кои делуват како природно средство за смирување.
- ДОПИР
Допирот е едно од најдобро развиените сетила при раѓањето. Бебето од почеток може да разликува различни температури, текстури, форми, па дури и тежина на предметите. Допирот е сетило кое е најважно за зближување со бебето. Кога го гушкате бебето, тоа се чувствува топло и безбедно, како во мајчината утроба. Бебињата истражуваат низ допир, потенцира д-р Таи, а нивна алатка се устите, затоа не грижете се ако бебето џвака или цица работи кои ќе ги дофати.
Што вие можете да направите?
Често држете го бебето во прегратка. Контактот кожа на кожа има посебен терапевтски ефект на бебето. Масирајте го бебето со нежни движења. Дозволете му на почувствува различни предмети на својата кожа, како меки плишани играчки или рапава топка. Кога ќе почне да ги користи рачињата, давајте му играчки во различни форми, големини и текстура.
- МИРИС
Вашето бебе има добар осет за мирис од самиот почеток. Го препознава вашиот мирис од првиот ден и ги препознава мирисите на останатите лица околу себе во првата недела од животот. Бебето го користи мирисот за да учи за опкружувањето околу себе и за да ги идентификува лагодностите и потенцијалните опасности.
Што вие можете да направите?
Педијатрите препорауваат редовно користење на исти производи оти бебето го сака она што му е познати и на кое навикнало. За да го развијат чувството за мирис, изложете го на различни мириси и зборувајте му на бебето кој е тој мирис, што истовремено го поттикнува и развојот на говор.
- ВКУС
Рецепторите за вкус кај бебето во целост се формирани од денот на раѓање. Бебето е родено со преферирање на сладок вкус и ги препознава вкусовите на храната која вие ја јадете, низ млекото.
Што вие можете да направите?
Јадете разновидна храна додека доите, а околу 6. месец понудете му на бебето разлилна храна и вкусови. Со тоа, на бебето од почетокот ќе му понудите многу вкусови на здрава храна. Секако ако во семејството постои историја на алергија на храна или бебето има егзема, посоветувајте со педијатарот пред да воведете нови намирници во исхраната на детето.
