Како родители, често се соочуваме со различни изјави од нашите деца – од секојдневни коментари до посериозни забелешки. Иако некои изгледаат безопасни, одредени изјави може да укажуваат на подлабоки прашања или потреби кои не треба да ги игнорираме. Препознавањето и навременото реагирање на таквите изјави е од клучно значење за емоционалното и психолошкото здравје на детето. Така, според различни експерти, ова се некои фрази кои родителите не треба да ги игнорираат.
Никој не ме сака.
Кога детето изразува чувства на неприфаќање или осаменост, тоа може да сигнализира проблеми со односите со врсниците или ниска самодоверба. Важно е да се истражат причините за таквите чувства и да се даде поддршка на детето во градењето на позитивна слика за себе.
Не сакам да одам на училиште.
Одбивањето да оди на училиште може да укаже на различни проблеми, како што се тешкотии во учењето, конфликти со врсниците или дури и малтретирање. Наместо веднаш да претпоставиме дека тоа е мрзеливост, треба да разговараме со детето и да се обидеме да разбереме што го мачи.
Те мразам.
Иако ваквата изјава може да биде болна за родителите, таа често се кажува во момент на фрустрација или лутина. Наместо да реагираме дефанзивно, треба да останеме смирени и да му помогнеме на детето да ги изрази своите чувства на конструктивен начин.
Сакам да бидам сам/а.
Потребата за повлекување може да биде нормална во одредени фази од развојот, но ако детето постојано избегнува друштво или активности кои претходно му донеле радост, тоа може да укажува на посериозни проблеми. Важно е да се следи ваквото однесување и доколку продолжи, да се побара стручна помош.
Никогаш не ме слушаш.
Ако детето чувствува дека родителот не го слуша, тоа може да доведе до фрустрација и чувство на запоставување. Активното слушање и потврдување на чувствата на детето помага да се изгради доверба и отворена комуникација. Според советникот за ментално здравје и терапевт д-р Кејли Спини Хоран, потврдувањето на чувствата на детето е клучно за подобрување на интеракциите родител-дете и за намалување на конфликтот.
Препознавањето на овие изјави и разбирањето на нивните можни значења ни помага подобро да ги поддржиме нашите деца во соочувањето со предизвиците. Отворениот и емпатичен разговор е клучен за градење доверба и безбедност во семејната средина.
