Децата неретко ги доведуваат родителите на раб на нерви и во тие моменти многу е тешко да се остане смирен и прибран и да се разговара со детето. Многу е полесно да го казните, а видот на казната зависи од родителската креативност – некои деца ќе бидат испратени во соба, на други ќе им биде одземена омилената играчка, на трети ќе им викаат. Иако проблемот краткорочно ќе биде решен, психолозите предупредуваат на долгорочни, негативни последици на ваквата пракса.
Спречува развој на самодисциплина кај детето
На секој родител му е цел да воспита личност која ќе биде подготвена да донесува сопствени одлуки на основа на своето искуство. Но, ако често ги казнувате децата и не им ги објаснувате последиците на нивните постапки, тие нема да научат што е исправно, а што е погрешно. Тие деца обично немаат самодисциплина или чувство за емпатија, оти никој не ги научил на овие важни работи. Тие само знаат дека постои дел од нив кој е непосакуван или лош, кој родителите не го сакаат.
Казнувањето не го менува детското однесување
Дури и ако мислите дека со казнувањето го учите детето на правилно однесување, наместо тоа му испраќате порака “Си направил нешто погрешно и ќе ги трпиш последиците“.
Детето не може да сфати што е погрешно, но ги помни негативните емоции кои ќе ги потисне, а ќе ги исфрли веќе при следниот инцидент.
Ја руши детската самодоверба
“Моите родители не ме сакаат и затоа ме казнуваат. Со мене нешто не е во ред“, тоа е порака што детето ја прима кога го казнувате. Иако не сакате вашето дете така да се чувствува, вашите постапки доведуваат до ваква реакција. Честото казнување во детството може да предизвика психички проблеми во подоцниот животен период.
Поттикнува страв
Следниот пат кога ќе сакате да го казните детето, запрашајте се едноставно прашање – сакате ли детето да се плаши од вас? Најверојатно одоговорот ќе биде “не“. Поентата е дека казнувањето создава однос втемелен на страв. Во тој однос децата стануваат анксиозни и живеат во страв да не ги разлутат родителите.
Со казнувањето му порачувате на детето дека се може да се реши со сила
Во очите на своите деца, вие сте најголем извор на моќ и авторитет. Значи, ако ја злоупотребувате својата моќ да ги казните, тие ќе помислат дека тоа е во ред. Казнувањето нуди совршен рецепт за малтретирање – ваште деца исто така може да ја покажат својата моќ над оние кои ги сметаат за послаби и да мислат дека со сила можат да добијат се. Со сила ништо не се решава. Следниот пат кога ќе ви дојде да се разбесните, длабоко вдишете и гушнете го своето дете.
