Децата помали од пет години можат да следат упатствата кога се во опасност, а по петгодишна возраст почнуваат да ги разбираат причините зошто постојат безбедносни правила. Тоа значи дека можат да ги разберат и последиците од пркосењето на истите.
Според педијатарот Кристина Џонс, ова се пет клучни работи што треба да ги знае секое петгодишно дете.
Основни лични податоци
Петгодишно дете треба да ги знае имињата и презимињата на своите родители, како и својата адреса и место или град во кој живее. На крајот, и телефонскиот број или мобилниот број на еден од родителите исто така спаѓа во категоријата лични податоци.
Што да направи ако се изгуби
Ако детето се изгуби, треба да побара други возрасни со деца и да ги замоли за помош, тврди д-р Џонс. Ако не може да ги воочи, научете го да побара униформирано лице, како што е полицаец или обезбедување или вработен во продавницата во која се наоѓа.
Да не отвора врата без возрасно лице
Деца на петгодишна возраст ќе се возбудат кога ќе го слушнат ѕвоното, но треба да им се објасни дека врата смеат да отворат само ако има возрасен со нив бидејќи од другата страна може да биде странец, а тие не можат да знаат дали е познат и доверлив.
Извршување едноставни работи
Кога децата ќе наполнат пет години, може да забележите дека ви нудат помош за одредени работи што ги правите. Одлично е да ги вклучите децата во домашните работи и да им дозволите да се чувствуваат горди кога ќе завршат некоја задача.
Притоа, важно е да го научите детето да ги знае границите. На пример, во ред е да ја постави масата, но ракувањето со ножеви нека им го препушти на возрасните.
Да повика итна помош во итни случаи
Деца од пет години треба да знаат да повикаат итна помош. Затоа е важно да ја знаат шифрата за отклучување на вашиот телефон и како да повикаат 194 или 112 и да замолат за помош. Исто така важно е да се разговара со детето кога повикувањето помош е оправдано.
