Во земјава почнува лекувањето на Ковид-19 со крвна плазма од излекувани пациенти, но „не секој пациент ќе може да се лекува со крвна плазма, за тоа треба да има услови“, изјави Министерот за здравство Венко Филипче.
На што се базирани нашите протоколи и кај кои пациенти ќе се употребува, објаснува д-р Рада Грубовиќ-Растворцева, раководителка на Институтот за трансфузиона медицина.
„Нашите протоколи се базирани на европските регулативи, но пред се, повеќе на американските бидејќи тие први после Кинезите почнаа со собирање и примена на овој вид плазма и ги следевме препораките на американските асоцијации на крвни банки, американската Агенција за храна и лекови (ФДА) каде што препорака е да се употребува плазмата кај тешки болни и кај животозагрозувачки и секако, болни за коишто клиничарот ќе процени дека болеста може да прогресира во тешка форма“, изјави д-р Грубовиќ-Растворцева, во емисијата „360 Степени“ на Алсат ТВ.
Терапијата со конвалесцентна плазма делува потенцијално ветувачки кај пациенти со COV-2 инфекција
„Терапијата со конвалесцентна плазма се покажала безбедна и ефикасна во борбата против болести предизвикани од вирусите EBOLA и SARS. Затоа делува потенцијално ветувачки нејзиното давање и кај пациенти со COV-2 инфекција“, вели медицинската директорка на Клиниката за инфективни болести и фебрилни состојби, Скопје, асс. мр. д-р Милена Стевановиќ, која се обрати до своите колеги – матични лекари во однос на селектирање на пациенти, потенцијални донори на плазма.
Терапијата со конвалесцентна плазма се покажала безбедна и ефикасна во борбата против болести предизвикани од вирусите EBOLA и SARS. Затоа делува потенцијално ветувачки нејзиното давање и кај пациенти со COV-2 инфекција
„Со денови и месеци сме и ќе бидеме сѐ уште, и вие како матични лекари и ние како клиничка институција, ставени во борба со инфекцијата предизвикана од новиот SARS–COV-2 коронавирус. Во настојувањата за нејзино совладување сѐ уште не постои специфична терапија, а за жал во скоро време не е на повид ни вакцина. Бројните тераписки искуства, и литерарно стручно и практично достапни во светот, со сите напори и можности се аплицираат и кај нашите пациенти“, вели д-р Стефановиќ.
Кратко по прележувањето на инфекцијата во организмот се создаваат антитела
Таа потсетува дека само кратко по прележувањето на инфекцијата во организмот се создаваат антитела за борба со инфекцијата. Плазмата која содржи антитела кои се борат со инфекцијата се нарекува конвалесцентна. „Нашите напори се насочени во добивање на конвалесцентна плазма преку вашите бази со податоци на пациенти кои ја прележале оваа инфекција. Постапката за донирање на плазма, плазмафереза, е постапка која трае 40 до 60 минути, со издвојување на 300 до 600 мл плазма и враќањето на другите компоненти на донорот. Самата плазма кај него многу бргу се надополнува“.
Кој може да биде донор на плазма
Д-р Стевановиќ, понатаму јасно прецизира кој може да биде дарител на плазма. Дарителот, донорот на плазмата треба да ги исполнува следните услови:
- Пред сѐ, прележана COVID-19 инфекција;
- 2 негативни теста во растојание од 24 часа, по инфекцијата;
- Да се минимум 21 ден без симптоми;
- Да се на возраст од над 18 и до 60 години;
- Да се со телесна тежина над 60 кг.
„Сите понатамошни иследувања би се правеле во координација со Kлиниката за инфективни болести и фебрилни состојби и Институтот за трансфузиона медицина. Сето горе наведено е, да потенцираме уште еднаш, за поуспешно лекување на пациентите со овој голем медицински предизвик пред сите нас“, објаснува докторката.
Ревносна селекција на пациенти
Нејзиниот апел до матичните лекари е „ревносно селектирање на вашите пациенти и информирање за нивниот контакт телефон до нашата институција. Сите понатамошни процедури, согласности или потребни дополнителни објаснувања ќе бидат спроведени од страна на лекaрите на Клиниката и Институтот за трансфузиона медицина“, додава директорката на Клиниката за инфективни болести и фебрилни состојби, Скопје.
