Малите деца не ја поднесуваат најдобро жештината, па затоа во топлите денови може да дојде до осип на кожата, иако не поминуваат многу време на сонце, дури и ако добро сте ги заштитиле.
Овој осип многумина го нарекуваат “вруќици или потници“ и може да им се случи на бебиња на возраст од неколку дена, што често ги вознемирува родителите.
- Како изгледа осипот?
Црвените ситни точки се појавуваат на кожата, а на допир кожата може да биде бодликава. Некогаш може да се случи да бидат и како бистри меурчиња кои се исполнети со течност.
Обично промените се јавуваат на кожата на вратот и главата и во пределот на градниот кош.
- Дали треба да се загрижите?
Нема голема причина за загриженост. Овој осип едноставно е начин на кој кожата реагира на собирањето пот.
- Што треба да направите?
Прво, немојте да се грижите. Осипот со тек на времето сам ќе помине. Најдобро е веднаш да го отстраните она што предизвикало промени на кожата. Ако детето има премногу облека на себе, тргнете ги тие слоеви, за да може да диши. Разладете го детето и тргнете го од топлина.
Совет е да не мачкате креми, бидејќи тие може да ја влошат состојбата.
- Како да спречите појава на осип?
Кога сте надвор со деца, трудете се да бидете штп повеќе во ладовина. Исто така, на високи температури немојте премногу да ги облекувате децата. Ако вам ви е многу топло, сигурно му е и на детето.
Доколку вашето дете е склоно на потење, земете резервна облека, па одвреме навреме пресоблекувајте го.
Избегнувајте и влажни простории, бидејќи може да доведат до потење и појава на осип.
