Во бременоста често се појавуваат чудни и необични симптоми кои многу трудници ги припишуваат на моменталната состојба, па најчесто и не реагираат. Една од нив е и Џесика Гриб од Св. Луис, чие игнорирање на знаците за предупредување, вели таа, за малку ќе ја чинело живот.
Кога била бремена во 32. недела со своето второ дете, нејзиниот крвен притисок почнал да расте. Тогаш 30-годишната мајка не размислувала многу за тоа, мислејќи дека тоа е нормална реакција во бременоста и нешто на што не треба да обрнува посебно внимание. Како што раскажува за „Today“, таа не верувала дека тоа би можело да биде знак за предупредување на кој треба да се реагира.
Доживеала затајување на срцето
„Не мислев дека покачениот крвен притисок е толку опасен во бременоста, но по некое време сепак, побарав помош од лекар поради непријатни симптоми. Лекарот ми препиша лекови, но тоа не помогна значајно. Притисокот не се намалуваше, а јас наместо да реагирам, целосно ја игнорирав мојата состојба“, почнува Џесика, која по породувањето доживеала застој на срцето.
Тогаш дознала дека има перипартална кардиомиопатија, вид на затајување на срцето или слабост на срцевиот мускул што се јавува на крајот од бременоста или во првите пет месеци од породувањето. Нејзината докторка Кетрин Линдли изјави за „Today“ дека оваа ретка состојба е многу тешко да се открие бидејќи ги имитира симптомите на бременоста, што ги збунува не само трудниците, туку и експертите.
Не мислев дека покачениот крвен притисок е толку опасен во бременоста, но по некое време сепак, побарав помош од лекар поради непријатни симптоми. Лекарот ми препиша лекови, но тоа не помогна значајно. Притисокот не се намалуваше, а јас наместо да реагирам, целосно ја игнорирав мојата состојба
„Мојата најголема желба е да ја подигнам свеста за оваа болест. Сакам жените слободно да зборуваат за симптомите што ги забележале за да може сите други трудници или млади мајки да знаат да ги препознаат знаците на перипартална кардиомиопатија и затајување на срцето“, вели Џесика, на која по откривањето на болеста и бил направен итен царски рез. Додека се опоравувала во собата по породувањето, доживеала застој на срцето.
Успеала да се извлече благодарение на брзата интервенција
„Лекарите се обидуваа да ме оживеат повеќе од десет минути. Беше очигледно дека имам срцева болест и дека може да заврши трагично. Благодарение на професионалниот персонал кој даде се од себе, денеска сум тука“, објаснува таа. По операцијата на отворено срце и вградување на пумпа за срце, била две недели на апарати. Дури откако се разбудила од индуцираната кома, првпат ја видела својата ќерка по породувањето.
„Бев толку емотивна, потресена, а сепак неописливо среќна што можев да бидам со неа. Всушност, бев среќна што воопшто останав жива и што лекарите успеаја да ми го спасат животот во последен момент“, додава Џесика, која денес е мајка на три деца. Сето ова, забележува таа, ќе било невозможно да не бил медицинскиот персонал кој ја препознал нејзината состојба и интервенирал во последен момент.
Токму затоа, вели таа, сака да ги предупреди сите трудници, но и млади мајки, редовно да го проверуваат притисокот и да реагираат на кој било сомнителен симптом во бременоста.
