Ситуациите во кои го исклучувате телевизорот, а детето ве моли да пуштите уште пет минути или уште една епизода, како и оние во кои ве моли да му купите „само уште една играчка“, се редовна појава за многу родители. Сосема сигурно е полесно да му угодите на детето и да избегнете плачење и лутина кои во спротивно би следеле, но тоа секако не е најдобрата опција, туку само еден од начините на кои придонесуваме детето да стане разгалено и да продолжи да ги поместува нашите граници.
„Начинот на кој разговараме со децата – без разлика дали им попуштаме, ги поткупуваме или им дозволуваме да избегнуваат одговорности – го обликува нивното разбирање за нашите граници и последици“, вели детскиот психолог Ен-Луиз Локхарт. „Со тек на времето, тие можат да почнат да мислат дека имаат право на работи, дека не мора да ги заслужат, што може да влијае на нивните односи и однесување како растат.
Психолозите предупредуваат на уште некои други начини и фрази со кои несвесно го наведуваме детето да стане разгалено – обрнете внимание.
ОК, добро, само овој пат
Ако, да речеме, одбиете да му купите на детето чоколадо во продавница, што се случува кога тоа продолжува да ве моли за тоа, а вие конечно попуштите?
“Ова ги учи дека границите се флексибилни и дека можат да ве ‘скршат’ ако се доволно упорни. Со текот на времето детето сфаќа дека ако е доволно упорно, ќе го добие она што го сака”, предупредува психологот Лохарт.
Наместо тоа, советот е да бидете внимателни кога ќе кажете „не“ и да се согласите ако се работи за нешто што не ви е толку важно или цврсто да се држите до вашиот одговор ако се работи за нешто што ви е навистина важно.
Во тој случај, кога детето и понатаму ве моли за нешто, можете да кажете: „Во ред, те слушнав, размислував, одговорот е сè уште не“.
Одржувањето на границите му покажува на детето дека таа е поставена со причина, а исто така го учи како да се справи со разочарувањето.
Ако бидеш добар/а, ќе те почестам со нешто
“Иако наградите имаат свое место во воспитувањето, нивното постојано користење за да се управува со однесувањето на детето, го учи да се однесува убаво само кога нешто ќе добие“, предупредува Лохарт.
Наместо тоа, таа советува да користите природни последици и охрабрување.
„Можете да кажете нешто како: Заврши со домашната и беше концентриран. Сега имаш повеќе време да си играш надвор пред вечера“, предлага таа.
Еве, сега
Одложувањето на потребата или барањето на детето во случаи кога тоа не е нешто итно, учењето на детето да чека е важна алатка во воспитувањето, вели детскиот психолог Мишел Борба.
На пример, кога зборувате на телефон и вашето дете постојано ве прекинува за да праша нешто, сосема е во ред да кренете рака и да му кажете дека треба да почека додека не завршите.
„Тие мора да научат дека не може секогаш сè да биде како што тие сакаат“, додава таа.
Ќе ти дадам, но ако ветиш дека убаво ќе се однесуваш
„Постојат големи шанси вашето дете да не може да го исполни тоа ветување бидејќи сега е сега, а после е после“, вели психологот Ајлин Кенеди Мур. Наместо тоа, нејзиниот совет е да се фокусирате на природните последици подоцна, а не пред доброто однесување на детето. На пример, можете да кажете: „Ако сега се облечеш, ќе имаме повеќе време да играме пред училиште“.
Не мора да го правиш тоа ако не сакаш
Ако ја користите оваа реченица за да му дозволите на вашето дете да избегне некои одговорности, како што се домашните работи, не го учите да биде одговорен.
„На овој начин му испраќате порака дека не мора да ја почитува одговорноста доколку не сака, што негативно ќе влијае на неговата способност да поднесе непријатност или да истрае во некои предизвикувачки ситуации“, предупредува Лохарт.
Сто пати ти кажав
„Ако му кажете на детето да направи нешто 12 пати, вие го учите да ве игнорира 11 од 12 пати“, истакнува Кенеди Мур.
Ако вашето дете не ве послуша првиот пат, нејзиниот совет е прво да се погрижите да го имате вниманието на детето така што ќе му пријдете, ќе остварите контакт со очите или ќе ја ставите раката на неговото рамо.
„Кажете му што треба да прави пред она што не треба да го прави и дајте му само по една инструкција. Може да помогне да застанете тивко покрај детето, чекајќи го да го направи она што треба да го направи“.
