Американските здравствени агенции денеска повикаа на итно запирање на вакцинацијата со вакцината на „Џонсон и Џонсон“ откако шест лица во САД, по вакцинирањето добиле редок несакан ефект на згрутчување на крвта, две недели откако биле вакцинирани, објави „Њујорк Тајмс“. Тоа е единствената вакцина на пазарот што се прима во единечна доза.
- Сите шест вакцинирани се жени на возраст од 18 до 48 години. Едната жена починала, а друга се наоѓа во критична состојба во болница.
Во Америка досега се вакцинирани седум милиони луѓе со оваа вакцина, а околу девет милиони дози излегле надвор од САД. Додека овие шест случаи значат еден критичен случај на згрутчување на крвта на милион вакцинирани лица, сепак Американскиот центар за превенција на болести повикува на претпазливост и привремен прекин на вакцинацијата со „Џонсон и Џонсон“.
Во последното известување на FDA и CDC се вели дека сите федерални здравствени канали – масовни места за вакцинација, здравствени центри во заедницата и слично – кои претходно ја давале вакцината на „Џонсон и Џонсон“, засега веднаш ќе престанат со нејзина употреба, пренесе Си-Ен-Ен.
Пред неколку дена, Европската агенција за лекови објави дека ја испитува вакцината на „Џонсон и Џонсон“ поради извештаи за ретки тромби.
