Современиот начин на живот сè повеќе го загрозува здравјето на детските очи. Стручњаците предупредуваат дека кратковидноста (миопијата) кај децата нагло расте ширум светот. Предвидувањата се дека до 2050 година речиси половина од светската популација ќе биде кратковидна. Децата се особено ранливи затоа што нивните очи сè уште растат и се формираат.
Причината лежи во издолжувањето на очното јаболко, а важна улога играат и генетиката и стилот на живот. Ако родителите се кратковиди, поголеми се шансите и детето да развие оваа состојба. Но, особено загрижува фактот што факторите од околината сè повеќе влијаат – особено премногу време поминато пред екрани и премалку време на дневна светлина.
Екрани насекаде – но природата сè уште е тука
Децата денес поминуваат часови гледајќи во близина: книги, мобилни телефони, таблети, компјутери.
Истражувањата покажуваат дека децата кои поминуваат четири часа дневно пред екран имаат двојно поголем ризик од развој на миопија во однос на оние кои ги користат екрани еден час или помалку.
Од друга страна, престојот на отворено докажано ги штити очите. Само 60 минути дневно на природна светлина може значително да го намали ризикот од кратковидност, а гледањето во далечина го опушта окото и им дава „одмор“ на очните мускули.
Како родителите можат да помогнат?
- Престој на отворено секој ден – поттикнете го детето да се игра, прошета или занимава со спорт барем еден час дневно.
- Ограничете го времето пред екрани – до петтата година најмногу еден час дневно, а до дванаесеттата до два часа.
- Пауза за очите – на секои пола час гледање во близина, нека детето погледне низ прозорец или кратко да се истегне.
- Правилно држење и оддалеченост – книгата, тетратката или екран треба да бидат барем 30 см од очите.
- Редовни прегледи на видот – особено ако детето шкири, се приближува кон екран или се жали на главоболка.
Погледнете подалеку од екранот
Кратковидноста станува тивка епидемија на современото детство. Иако генетиката игра улога, стилот на живот е она што можеме да го смениме. Престојот во природа, помалку екрани, повеќе светлина и редовни прегледи – се мали, но силни навики што можат да го зачуваат здравјето на детските очи и нивниот поглед кон светот.
