Пубертетот е последниот дел од детството, односно периодот во кој телото на детето созрева во тело на возрасен човек способен за репродукција. Иако секое дете влегува во пубертет кога е за тоа подготвено, во повеќето случаи тоа се случува околу 12-годишна возраст. Девојчињата често влегуваат во пубертет две години порано од момчињата. Како што објаснуваат лекарите, постојат неколку знаци кои јасно покажуваат дека детето влегло во таа фаза од животот.
Девојчињата често влегуваат во пубертет две години порано од момчињата
Знаци на пубертет кај девојчињата вклучуваат раст на срамни и други влакна на телото, зголемено потење, нагло растење во висина, развој на градите, почеток на менструацијата и проблеми со кожата, најчесто појава на мозолчиња или акни. Кај момчињата, знаците на пубертет се донекаде слични. Тие исто така вклучуваат раст на срамни влакна, други влакна на телото и на лицето, зголемено потење, брз раст во висина и промени на кожата, но и зголемување на тестисите и пенисот, раст на мускулите и продлабочување на гласот.
Покрај физичките промени, пубертетот носи и психолошки промени. Чести се промените во расположението кај децата, како и ненадејното спознавање на сопствената сексуалност, развивање на идентитетот и желба за стекнување на независност од родителите. Како што објаснуваат психолозите, детето во пубертет исто така често влегува во конфликт со еден или со двајцата родители.
