Споделувањето на соба со брат или сестра може да биде прекрасно искуство за децата што ќе го паметат цел живот. Сепак, со растењето, се појавуваат некои нови потреби, па споделувањето соба може да стане предизвик. Приватноста станува сè поважна за децата за време на пубертетот, а делењето на просторот со помал брат или сестра може да ја попречи оваа потреба.
- Поставете правилата и олеснете им на децата
Споделувањето соба е забавно за децата најмногу до пубертетот кога им станува сè потешко да се чувствуваат удобно во просторот со помал брат или сестра, особено ако е од спротивниот пол.
Семејниот терапевт Емили Кирчер-Морис вели дека е најдобро да ги следите развојните промени на детето за да го воочите вистинското време за одвојување. Таа тврди дека не постои некое специфично, идеално време за ова, туку зависи од детето.
Меѓутоа, секоја семејна ситуација е различна и многумина немаат можност да ги сместат децата во одделни соби, но во тој случај пожелно е да се одредат некои правила за да им се олесни на децата. Нека се пресоблекуваат во тоалет или во некоја друга просторија од куќата, каде што можат да имаат приватност. Исто така, други простории во куќата можат да му послужат на дете во пубертет за дневен одмор и престој, додека помалиот брат или сестра се во заедничката соба.
- Паметно организирајте го просторот
Детските соби се често неуредни, што може да доведе до расправии меѓу браќата и сестрите, особено ако се изгуби некој вреден предмет. Одржувањето на собата уредна може да ја намали напнатоста и да им помогне да уживаат во просторот, иако го делат.
Поттикнете ги децата да не трупаат работи и да се ослободат од се што не им служи. Поставете доволно полици и фиоки за да ги чување на работите, а при купувањето мебел, водете сметка за тоа да има доволно прегради за складирање, за да не мора работите да седат на подот.
Доколку е можно, погрижете се децата да имаат свои слушалки за да можат да слушаат музика, да гледаат филмови и серии одделно и да не си пречат еден со друг.
