Сите сме слушнале за постпородилна депресија со која се соочуваат мајките, но дали знаевте дека и татковците можат да се соочат со оваа состојба? Резултатите од истражувањето објавени во списанието на Американското медицинско здружение, истакнуваат дека кај околу 10% од идните татковци симптомите на депресија се појавуваат од првиот триместар од бременоста на нивните сопруги и траат уште шест месеци по раѓањето на бебето.
Познато е дека постпородилната депресија кај мајките може да биде поврзана со хормонална нерамнотежа за време и по бременоста. Истражувањата покажуваат дека идните татковци, од се уште непознати причини, поминуваат низ хормонални промени во овој период. Нивото на машкиот полов хормон тестостеро, опаѓа, додека нивото на „женските“ хормони – естроген и пролактин, како и на „хормонот на стрес“ (кортизол) се зголемува.
Некои особено чувствителни мажи чии жени чекаат дете може да развијат симптоми како мачнина и прекумерна телесна тежина. „Еволутивните биолози се сомневаат дека со помош на хормоналните флуктуации кај мажите се зголемуваат шансите таткото да не го напушти семејството, бидејќи меѓу него и детето се воспоставуваат емоционални врски“, објаснува американскиот специјалист за машко здравје, Вилијам Кортни. Кога овие хормонски флуктуации се комбинираат со неврохемиски промени во мозокот предизвикани од хроничен недостаток на сон, тоа може да предизвика постпородилна депресија, објаснуваат експертите.
Покрај недостатокот на сон, главната причина за постпородилна депресија кај татковците, улога можат да играат и други фактори, пред се природната склоност кон депресија и стрес. Извори на стрес може да бидат заладените односи со мајката на детето, финансиските проблеми, обврските околу бебето, присуството на некаква болест. „Сите родители доживуваат емоционални и социјални пресврти поврзани со раѓањето на бебето“, објаснува психотерапевтката Сара Розенквист.
Ако постпородилната депресија е присутна кај мајката, тоа може да го зголеми ризикот да се појави и кај таткото, велат експертите. „Кога мажите почнуваат да доживуваат постојана вознемиреност, страв, копнеж, чувство на духовна празнина или чувствуваат дека сè е надвор од контрола, тие може да сфатат дека нешто не е во ред со нив, но длабоко ги потиснуваат своите емоции и не бараат помош. “, вели д-р Вилијам Кортни.
Кои се симптомите на постпородилна депресија кај татковците
Кај некои мажи, постпородилната депресија може да се манифестира во постојано депресивно расположение, додека некои стануваат раздразливи, возбудени, па дури и агресивни. Татковците може да почнат да страдаат од отежнато дишење, срцебиење, дури и напади на паника. Може да изгубат интерес за секс или активности кои претходно им носеле радост. Еден од честите симптоми е работохолизмот – мажот се повеќе се потопува во работата бидејќи не знае како да се справи со стресот.
Доколку симптомите траат подолго од две недели и влијаат на квалитетот на животот или сметате дека ви треба помош, важно е да се консултирате со специјалист или да го советувате партнерот да го стори тоа. Покрај тоа, треба да се обидете да си обезбедите повеќе сон, вежбање, престој во природа или средба со пријателите. Разговорите меѓу партнерите за тоа како се чувствуваат се од клучно значење.
Експертите истакнуваат дека со оваа состојба се соочуваат и татковците кои си поставуваат високи барања и често се прашуваат дали се доволно добри како татковци. „Важно е да се запамети дека сите негативни ефекти од машката постпородилна депресија може да се избегнат. Со правилен третман и поддршка, мажот може целосно да се опорави. Терапијата може да го спаси животот на мажот или неговиот брак. Ако таткото не може да се натера да си оди на специјалист за себе, важно е да го направи тоа за своето дете. Мажите треба да сфатат дека депресијата е болест, а не слабост на карактерот. Признавањето дека сте депресивни не значи да се биде кукавица и да се откажете. Тоа значи преземање одговорност за својот живот“. – објаснува д-р Кортни.
