Потрес на мозокот кај децата се јавува како последица на трауматска повреда на главата која може да варира од полесна до потешка. Според лекарите од Мајо клиниката, до потрес на мозокот во повеќето случаи доаѓа по силен удар во главата. Повеќето потреси се предизвикани од спортска повреда на главата до која може да дојде со директен удар во главата, лицето или телото.
Но, како да препознаете дека станува збор за потрес на мозокот, а не само за лесна повреда на главата за која не е потребен лекарски преглед? Како што објаснуваат педијатрите, симптомите на потрес на мозокот може да вклучуваат:
- Главоболка или непријатно чувство на притисок во главата
- Нерамномерни зеници
- Мачнина или повраќање
- Проблеми со рамнотежата
- Вртоглавица
- Двоен или заматен вид
- Чувствителност на светлина или бучава
- Чувство на ненадеен замор, тромост или замаеност
- Проблеми со помнењето или концентрацијата
- Збунетост
- Бавност во разбирањето и одговарањето на прашања
- Проблеми со спиењето
- Промени во расположението
- Раздразливост
- Промени во однесувањето.
Во случај потресот на мозок да не се препознае навреме, може да дојде до сериозни последици како губење на свеста, отекување на мозокот, крварење, па дури и кома. Токму затоа, предупредуваат педијатрите, од исклучителна важност е да се следи детето по секој удар во главата за да се спречат опасните последици.
