Новопечените родители речиси секогаш се преплашени од многуте правила кои доаѓаат со бебињата, особено кога станува збор за ранливи и осетливи новородени бебиња. Правила и препораки за хранење, носење, капење и слично има колку сакате. Спиењето на бебињата можеби е на врвот на таа листа, а неодамнешното истражување на Американската академија за педијатрија покажало дека помалку од 50 проценти од родителите ја следат препораката за безбедно спиење на бебињата, а тоа е спиењето на грб.
Неодамнешното истражување на Американската академија за педијатрија покажало дека помалку од 50 проценти од родителите ја следат препораката за безбедно спиење на бебињата, а тоа е спиењето на грб
По испитувањето на 3.297 мајки, истражувачите откриле дека само 44 отсто ги ставаат своите бебиња во правилна положба, а повеќе од 50 отсто сметаат дека е побезбедно нивните бебиња да спијат на страна или на стомак. Тие, исто така, дошле до сознанија дека новите родители се под големо влијание на она што го прават другите околу нив, како што се членовите на семејството и пријателите.
Педијатарот Ив Колсон рече дека не е изненадена од резултатите: „Овие наоди не се ништо необично. Исто така откривме и фактори кои се силно поврзани со положбата на спиењето, вклучувајќи ги ставовите, субјективните норми и воочената контрола“.
Но, според д-р Колсон, раното родителство е време во кое постои заситеност со претерана количина на информации и премалку сон и нагласува дека не треба да се заборави фактот дека секој има мислење за тоа што би „требало“ да прават новите родители.
Се разбира, може да биде тешко „секогаш“ да се прави нешто како родител, но ова е важен потсетник дека кога станува збор за здравјето и безбедноста, најважен е советот на лекарите и експертите кои на родителите им даваат јасни и точни насоки.
