Повраќањето е всушност исфрлање на содржината на желудникот и се јавува релативно често кај децата, поради различни причини. Обично не трае долго, а еве ги сите можни причини и како се лекува.
Причини за повраќање
Различни работи може да предизвикаат повраќање кај децата. Во повеќето случаи тоа се гастроентеритис, стомачни и цревни инфекции. Гастроентеритисот често се нарекува стомачен грип, а најчесто е предизвикан од вируси, иако може да биде предизвикан и од бактерии и паразити. Покрај повраќање, гастроентеритисот предизвикува гадење, болки во стомакот и дијареа.
Повраќањето предизвикано од гастроентеритис обично трае помалку од 24 часа, а останатите симптоми се подобруваат за неколку дена, објаснуваат лекарите на kidshealth.org.
Покрај ова, причина за повраќање кај децата може да биде и труење со храна или повраќање поради гадење при возење во автомобил.
Поретко, повраќањето исто така може да биде знак што укажува на некои посериозни проблеми, како што се:
- Блокирана црева, како што е пилорна стеноза кај новороденчиња
- Други проблеми со желудникот и цревата, како што е воспаление на слепото црево
- Зголемен притисок во мозокот кој може да се појави по повреда на главата или како симптом на менингитис или тумор на мозокот
Како да се утврди причината за повраќање
Кога станува збор за повраќање, лекарите обично најпрво се сомневаат на стомачен грип или вирус, а дали станува збор за тоа, тие утврдуваат врз основа на други симптоми. Ако детето често повраќа или е многу болно или се чувствува лошо, лекарите понекогаш прават тест на урина, крв или други тестови.
Третман
Лекувањето на повраќањето зависи од причината. Повраќањето од гастроентеритис обично само исчезнува за помалку од 24 часа.
Ако вашето малечко повраќа, спречете дехидрација со тоа што ќе се погрижите да пие доволно течности или доколку е потребно дајте му орален раствор за рехидратација. Започнете со мали голтки, по една или две лажички на секои неколку минути.
Бебињата кои се дојат или хранат со адаптирано млеко можат да продолжат да се хранат вообичаено, освен ако не повраќаат одново и одново.
Не давајте им на бебињата вода наместо раствор за рехидратација, а исто така не им давајте на децата лекови против повраќање, освен ако тоа не го препорача вашиот лекар.
Кога детето ќе престане да повраќа, понудете му мали количини цврста храна, како тост, крекери, ориз или пире од компири. Јогуртот, овошјето, зеленчукот и посното месо, како пилешкото, се исто така добар избор на полесна храна која нема да го оптоварува желудникот по повраќање.
Кога треба да одите на лекар?
Повраќањето најчесто не е причина за загриженост, но одете на лекар ако:
- Детето не може да пие течност неколку часа
- Забележите знаци на дехидрација – поретко мокрење, плачење со малку или без солзи, сува уста или испукани усни, вртоглавица, детето изгледа поспано или е успиено, т.е. тешко се буди
- Има висока температура
- Детето повраќа крв или повратената содржина има зелена или кафеава боја
- Има силни болки во стомакот или грбот
- Има главоболка или вкочанет врат
- Детето повраќа по повреда на главата
- Повраќање повеќе од 24 часа
