Светот на новите родители е полн со нови прашања и ситуации. Она што на поискусните родители им изгледа јасно и небитно за објаснување, за новопечените родители често е нешто што сакаат детално да го знаат и проучат. Покрај сите пелени, доење, хранење и спиење, едно од навидум поедноставните прашања е и: како правилно да се стерилизира бебешката цуцла?
Секако, не секое бебе користи цуцла. Некои родители воопшто не ја практикуваат, други ја користат само во исклучителни ситуации, а има и такви што би биле пресреќни кога нивното бебе би прифатило цуцла барем накратко. Постојат и дилеми околу изборот на цуцла, но тоа е тема за друга прилика. Најважно е бебето да е мирно и задоволно, а кај многу бебиња самото цицање има смирувачки ефект. Доколку бебето е сито, здраво и одморено, понекогаш едноставно му е потребна цуцла.
Иако знаеме дека не е секогаш добро сè да се стерилизира и дека бебињата треба да бидат изложени на одредени бактерии за да изградат имунитет, сепак не можеме да му дадеме цуцла со сомнителна чистота. Не зборуваме за краток допир со рачињата или паѓање на под дома, но повремено е препорачливо цуцлата темелно да се исчисти. Тука ви помага овој едноставен водич за стерилизација на бебешката цуцла – или цуцлата на вашето малечко, ако љубовта кон цицањето потрае малку подолго.
Зошто е важно да се стерилизира цуцлата
Цуцлите лесно собираат микроби – од облека, под и други површини, додека не се во устата на бебето. На нив може да се развијат мувла или габички и да се пренесат инфекции, како што е соор – честа габична инфекција во усната празнина. Затоа е важно цуцлата да се стерилизира пред првата употреба и редовно да се чисти по користењето.
Стерилизацијата е особено важна кај бебиња помали од шест месеци или кај деца со зголемен ризик од заболувања, како што се деца со ослабен имунитет или деца кои посетуваат градинка. Иако не е неопходно цуцлата да се стерилизира при секое чистење, препорачливо е секојдневно да се мие со средство за миење шишенца и топла вода.
Како да ја стерилизирате бебешката цуцла
- Чекор 1
Пред стерилизација, најпрво измијте ја цуцлата со топла вода. Избегнувајте абразивни средства, силни детергенти за садови или антибактериски препарати.
- Чекор 2
За стерилизација, можете да користите апарат за стерилизација (доколку го имате) или да ја оставите цуцлата во врела вода околу пет минути. Двата начини се ефикасни.
- Чекор 3
Внимателно извадете ја цуцлата од водата со чист кујнски прибор, како голема лажица или кутлача. Ако во неа има останато вода, нежно притиснете ја за да истече.
- Чекор 4
Поставете ја цуцлата на чиста решетка за сушење или исушете ја со чиста крпа, повторно лесно притискајќи ја гумата за да се уверите дека внатре нема вода.
Пред да му ја дадете на бебето, задолжително проверете дали цуцлата целосно се изладила.
