ОД 35 ДО 39 ГОДИНИ
- ТЕЛО
Плодноста продолжува да опаѓа по 35. година, а околу 38. доаѓа до значаен пад кој се заснова на страеење на јајцеклетките и станува се потешко да се дојде до оплодување. Се до 35. се советува до бременост да се дојде со незаштитен однос во период од една година, а дури потоа да се побара лекарска помош и да се лечи неплодноста, додека кај жените по 35. тој период се скратува на 6 месеци. Најголем проблем кај паровите кои се лекуваат од неплодност, претставува токму тоа одложување на лечењето, затоа што постои голема разлика во успешноста на терапијата кај жените во доцни 30. и оние во рани 40. Ризикот од висок крвен притисок кај жените над 35. година двојно е поголем во споредба со помладите. Хипертензијата ги погодува околу 10-20% од трудниците во оваа старосна група. Гестацискиот дијабетес е два до три пати почест кај жените над 35 години, а е уште поголем ако жената добила на телесна тежина повеќе од нормалното во текот на претходните години. Жените од 35-39 години имаат двојно поголеми шанси за царски рез.
- ЕМОТИВНА СОСТОЈБА
Ова се години во кои лекарите најчесто препорачуваат амниоцентеза или некој друг метод на пренатална дијагностика, кој кај многу жени предизвикуваат немир додека ги чекаат резултатите, знаејќи дека ризикот од хромозомски пореметувања е значајно поголем во оваа возраст.
- РИЗИК ЗА БЕБЕТО
Веројатноста дека ќе имате повеќе од едно бебе, значајно е поголема во доцните 30. и раните 40. години, поради тоа што хормонската стимулација на јајчниците се менува со стареењето, зголемувајќи ги шансите за отпуштање на повеќе од една јајцеклетка. Процентот од спонтан абортус по 35-та година е скоро 18%. Процентот на мртвородени бебиња е дупло поголем меѓу постарите трудници, иако причините за тоа не се утврдени.
ОД 40 ДО 44 ГОДИНИ
- ТЕЛО
Поновите истражувања покажуваат дека жените кои ќе родат дете по 40. година, без помош на лекови и други методи на асистирано оплодување, живеат подолго од оние кои забремениле порано. Зошто? Една од теориите е дека естрогенот, кој и понатаму обилно се лачи кај жените кои немаат проблем со плодноста, го продолжува животот на срцето, коските и другите органи. Сепак, помалку од 1% од жените од 40-44 години може да роди. Шансите да забремените по 40 година, паѓаат на само 5%.
Како ќе ја поднесете бременоста и породувањето во 40. зависи од повеќе фактори, вклучувајќи и во каква физичка форма сте, потоа општите здравствени навики, како и од тоа дали се работи за ваше прво дете. Трудниците во 40. најчесто се жалат на постојан замор. Хормоналните промени доведуваат до чувство на замор кај сите трудници, но на оваа возраст симптомите се поизразени.
Ако веќе сте раѓале, може да се случи да бидете склони на хемороиди, притисок во мочниот меур, опуштање на ткивото на матката и опуштање на градите, затоа што мускулите и другите ткива во овие делови на телото веќе поминале низ истегнување. Можете да се обидете да го намалите овој ефект трудејќи се, за време на бременоста да не подигате тешки предмети, да бидете умерено активни и да правите Кегелови вежби кои ги зацврстуваат вагиналните мускули.
- ЕМОТИВНА СОСТОЈБА
Кога ќе дојдете до 40 години, веќе ќе имате доволно животно искуство и зрелост на кои ќе можете да се потпрете при подигање на детето. Веројатно ќе имате и повеќе трпение, отколку во своите 20. а веројатно и повеќе грижи,најчесто од типот: “Ќе бидам престара кога детето ќе ми тргне на факултет”.
- РИЗИК ЗА БЕБЕТО
Околу една третина од бременостите кај жените од 40 до 44 години се завршува со спонтан абортус. Има неколку причини за тоа: јајцеклетките можат да бидат дефектни од самиот почеток, ендометриумот може да биде претенок или доводот на крв во матката да биде премногу слаб за да се одржи бременоста. Зголемен е и ризикот од плацента превиа (placenta praevia) – ниска поставеност на плацентата, на дното на матката која делумно или потполно го блокира отворот на грлото од матката и создава опасност од крварење или од одвојување на постелката, при што дел или целата плацента се одвојува од зидот на матката. А и бебињата на трудниците во 40. години имаат поголеми шанси за раѓање со помала телесна тежина, под 2,5кг.
Ризикот од хромозомски аберации рамномерно расте со секоја година по влегувањето во 40. Ако раѓате во четириесеттите години, шансите се 1 во 106 детето да се роди со Даунов синдром , а 1 во 66 со некоја друга хромозомска аномалија. До 44 година, овој ризик скока на 1 во 38, односно 1 во 26 случаи.
ОД 45 ДО 49 ГОДИНИ
- ТЕЛО
Процентот на жени кои раѓаат во овие години е 0,03%, а шансите за успешно лечење на неплодноста драстично опаѓаат. Самата можност за зачнување и одржување на бременоста претставуваат успех и одраз на вашето добро здравје. Често можеме да слушнеме приказни за жените кои успеваат да добијат дете во доцните четириесетти по пат на ин витро оплодување, меѓутоа повеќе од половина од ваквите случаеви, успехот им го должат на донаторските јајцеклетки.
Ако сте успеале да забремените, веројатно ќе морате да минете низ повеќе ригорозни тестирања. Повеќето трудници во 40. минуваат низ некој вид тестови на оптоварување за да се утврди здравјето на нивниот кардиоваскуларен систем, а со поголемо внимание се следат и знаците на дијабетес, проблеми со бубрезите.
- ЕМОТИВНА СОСТОЈБА
Повеќето жени во овие години се загрижени за здравјето на своето бебе, како и за сопственото здравје и тоа со добра причина, бидејќи ризикот за мајката и за бебето е навистина зголемен во овие години. Но, многу од бременостите во ова доба имаат добар исход. Што поголема грижа водите за себе, толку се поголеми шансите за успешна бременост.
- РИЗИК ЗА БЕБЕТО
Повеќето од половина бремености кај жени над 45 години се завршуваат со спонтан абортус пред 20. гестациска недела. Опасноста од хромозомски пореметувања драстично се зголемува. Со 45 години изгледите да се роди дете со Даунов синдром се 1 во 30, а 1 во 21 со друг недостаток. Кај жените од 49 години тој ризик е 1 во 11, односно 1 во 8 случаи.
НАД 50 ГОДИНИ
Просечно време за влегување во менопауза е 51 година, односно меѓу 45 и 55 година. Речиси сите бремености кај жени над 50 години се потпомогнати или со лекови против неплодност, хормонски суплементи или најчесто со донаторски јајцеклетки. Жените кои и понатаму овулираат обично мораат да земаат прогестерон најмалку првите два месеца како би успеале да ја одржат бременоста. Во овие години можноста од компликации е многу голема, вклучувајќи хипертензија, проблеми со бубрезите, како и проблеми со плацентата, па неопходно е строг лекарски надзор и внимание.
