Проблемите со тироидната жлезда често се поврзуваат со возрасните, а многу родители се изненадени кога ќе дознаат дека проблемите со тироидната жлезда се најчестото ендокрино нарушување кај децата на училишна возраст. Како што пренесува Kids Health, се проценува дека речиси 37 од 1000 деца имаат некоја форма на болест на тироидната жлезда.
Имено, на секоја клетка во телото и се потребни тироидни хормони за да функционира на своето нормално ниво, па проблемите со тироидната жлезда кај децата можат да влијаат на телото на многу различни начини, во зависност од видот на нарушување на тироидната жлезда што го има детето. Тироидните хормони играат особено важна улога во поддршката и регулирањето на растот, како и многу други телесни функции.
Кои се вообичаените проблеми со тироидната жлезда кај децата?
Двата најчести проблеми со тироидната жлезда кај децата се хипотироидизам и хипертироидизам. Други, поретки проблеми со тироидната жлезда кај децата, исто така, вклучуваат рак на тироидната жлезда и јазли на тироидата.
Хипотироидизам се јавува кога тироидната жлезда не испраќа доволно хормони во телото. Имено, тироидните хормони регулираат многу телесни функции, вклучувајќи го и телесниот метаболизам. Кога нема доволно хормони, системите на телото може да почнат да се забавуваат. Вообичаени симптоми на хипотироидизам кај децата вклучуваат:
- Запек
- Сува кожа
- Замор
- Чувство на студ
- Губење на косата
- Неправилни менструации (кај девојчињата)
- Слабо помнење или проблеми со концентрацијата
- Забавен раст
- Тромост
Хипотироидизмот може да биде вроден, што значи дека со него се раѓаат бебиња, или може да се стекне и да се развие во доцното детство или тинејџерските години. Една од најчестите причини за ниското ниво на хормоните е тироидитис (болест на Хашимото), автоимуна болест, која ја напаѓа тироидната жлезда и ја оштетува. Хашимото е многу честа кај девојчињата, додека многу поретко се јавува кај момчињата.
Од друга страна, хипертироидизам се јавува кога тироидната жлезда е прекумерна активна и испраќа премногу тироидни хормони во телото. Тоа може да предизвика „забрзување“ на телото, што пред се значи зголемување на метаболизмот во организмот. Вообичаени симптоми на хипертироидизам кај децата вклучуваат:
- Дијареа
- Потешкотии со концентрацијата
- Чувство на топлина
- Забрзан раст
- Огромен апетит
- Неправилни менструални циклуси (кај девојчињата)
- Раздразливост
- Мускулна слабост
- Тремор (обично во рацете)
Најчеста причина за хипертироидизам е Гравесовата болест, автоимуна болест која предизвикува формирање на антитела кои му кажуваат на телото да произведува повеќе тироидни хормони отколку што му е потребно. Други причини за хипертироидизам, исто така, вклучуваат воспаление и јазли во тироидната жлезда.
