ПИШУВА:
Проф. д-р Ацо Димов
специјалист по детска хирургија
♦♦♦♦♦♦♦
Најчести аномалии кај бебиња и деца кои се решаваат со операција (3)
Ингвиналната хернија (кила), аномалиите на папокот, неспуштен тестис (крипторхизам), хипоспадија (конгенитален пенилен дефект), варикоцела (проширени вени коишто го дренираат тестисот) и фимозата спаѓаат во групата на најчести аномалии (мани) во најраната детска возраст, коишто се манифестираат веднаш или набрзо по раѓањето.
Фимоза
Фимозата претставува состојба кога не може да се одголи кожата (препуциумот) од главата на пенисот. По раѓањето препуциумот е интимно сраснат со главата на пенисот, поради постоење на конатални атхезии (врски). Најчесто атхезиите во текот на првите три години од животот почнуваат да исчезнуваат. Во одреден број на случаи, отежнато е одголувањето на препуциумот и по третата и четвртата година од животот, поради недоволен еластицитет на препуциумот. Затоа во текот на првите три години од животот сметаме дека постои физиолошка фимоза и во овој период не треба да се одголува главичката, доколку е слободен отворот од мочоводот, бидејќи со насилното отворање се ствараат рагади (кожата напукнува), кои по нивното заздравување се ствараат лузни и се креира вистинска фимоза.
Циркумцизија
Индикација за пластика на препуциумот (циркумцизија) се поставува кај нерепонирачки препуциум, рецидивни уринарни инфекции и појава на гнојна инфекција која го исполнува просторот помеѓу главичката и препуциумот.
Операциите се изведуваат во општа анестезија
Децата се оперираат во општа анестезија. Во зависност од возраста на детето најчесто се користи ларингеална маска и ендотрахеален тубус. Кај сите деца се поставува каудален блок. Предоперативната припрема се состои од преглед на детето од страна на анестезиолог и педијатар. Рутински се прави и лабораториска анализа. Најмалку половина час пред интервенцијата детето се премедицира, потоа во присуство на еден од родителите и медицински персонал детето се внесува во оперaтивната сала, каде го прифаќа анестезиолошкиот тим.
Дали овие интервенции се сметаат за тешки?
Ова прашање редовно го поставуваат родителите откако по вообичаениот преглед ќе им се наговести потребата од хируршка интервенција. Мојот одговор е дека овие вродени состојби спаѓаат во групата на најчести елективни интервенции во детската хирургија кај нас и во светот. По објаснувањето дека нивното дете е во рацете на високопрофесионален и едуциран анестезиолошки и хируршки тим, родителите набрзо ја стекнуваат довербата во нас и ја прифаќаат хируршката интервенција.
◊◊◊◊◊◊◊
