Често родителите се во дилема кога прв пат треба да го однесат своето дете на стоматолог. Идеално би било до првиот роденден да се направи првиот стоматолошки преглед. Тој прв преглед има за цел едукација и превенција. Стоматологот може да ги предупреди родителите на што треба да обрнат внимание и да им даде совети за правилно одржување на хигиената на заботе кај малото дете.
Првиот преглед никако не треба да се случи по третата година од животот на детето.
Најчеста причина за појава на кариес кај децата е консумирањето на засладени напитоци и храна на шише, без миење на забите по оброкот, односно пред спиење. На тој начин се создаваат наслаги на млечните заби кои доведуваат до појава на т.н. циркуларен или шише кариес. Со тие наслаги се хранат бактериите создавајќи киселини кои ја нагризуваат обвивката на забот. Во почетокот тоа е видливо во форма на промена на бојата на забот која станува се повоочлива, а по некое време преминува во лезија на кариес.
Единствен начин да не дојде до тоа е избегнување на такви напитоци, а особено пред спиење и секако воведување на задолжително миење на забчињата. Додека детето е мало, доволно е со газа и со вода да се пребришат забите, а потоа со тек на време да се воведе и детска четка и на крај паста за заби наменета за деца ( по третата година).
Освен секојдневната орална хигиена и правилната исхрана, најважни се и редовните контроли кај стоматолог.
Редовните контроли на секои шест месеци се исклучително важни од повеќе причини. Ако детето не чувствува болка, тоа не зачи дека забите му се здрави, а тоа може да го провери само стоматолог. Здравјето на млечните заби мора да се одржува, бидејќи тие може подоцна да влијаат и на трајните заби. Освен тоа, редовните контроли се особено важни, бидејќи на тој начин детето усвојува навика за грижа за оралното здравје и осознава дека стоматолошката ординација не мора да биде причина за страв, бидејќи не оди таму единствено кога забот го боли.
