Првите чекори на бебето се важен момент, како за него, така и за родителите. Повеќето бебиња своите први чекори ги прават на една година, но со оглед на тоа дека секое дете е поинакво, некои од нив може да проодат порано, а некои подоцна.
Бебињата обично почнуваат да ползат помеѓу седмиот и десетиот месец. Околу деветиот месец вообичаено почнуваат да се дигаат држејќи се на намештајот кој им помага да бидат стабилни.
“Ова обично е знак дека детето наскоро би можело да ги направи своите први самостојни чекори. Еднаш кога бебето ќе се почувствува сигурно, ќе почне да прави мали чекори, држејќи се за вашата рака или за некој предмет. Ова е време кога треба да ги заштите острите предмети во станот, за бебето да не се повреди“, вели педијатарот д-р Шерилин Чечини од Њујорк.
Според неа, во овој период детето веројатно ќе почне и да клекнува и може да дофати играчка од подот од стоечка положба. Тоагш може да направи и неколку чекори, но се уште не е подготвено да се охрабри на самостојно одење.
Неколку недели подоцна, голема е веројатноста дека ги направи своите први климави чекори. Во почетокот тоа може да биде само еден чекор, но наскоро може да направи и неколку одеднаш. На почетокот ќе оди со раширени нозе и стапала насочени нанадвор, за да држи стабилност.
Првите чекори обично се случуваат околу првиот роденден, а самоувереното чекорење од 14. до 15. месец од животот. Но, како што истакнува д-р Чечини, некои бебиња не проодуваат до својот 16. месец, па дури и подоцна.
