Многу родители имаат проблем да му откријат на своето дете дека Дедо Мраз всушност не постои и дека ирвасите и магичните кочии кои летаат на небото се само сјајна бајка од која мора да излезат. Она што е најболно за мозочето на детето е фактот дека тие подароци ги купуваат мама и тато и дека тоа напразно се трудело да биде добро во текот на целата година и да пишува писмо на желби адресирани до Северниот пол.
И додека едни психолози им советувале на родителите секоја година да ги потврдуваат соништата на своите деца и да ги уверуваат дека нивниот омилен лик навистина постои, други барале од родителите кон децата да бидат сурово искрени и од мали нозе да им кажат дека станува збор за најпопуларната бајка на светот.
Дилемата и на двете групи родители ја решава психологот и стручњак за родителство Џастин Колсон, кој детално го образложи ставот на Асоцијацијата на психолози на Австралија и даде јасни упатства на родителите, кога и како на децата да им ја кажат вистината за Дедо Мраз.
„Секој родител спонтано одложува да му ја каже вистината на своето дете, бидејќи се плаши дека детето ќе ја изгуби довербата во него. Кога детето ќе се убеди дека Дедо Мраз не постои, првата реакција е – зошто сте ме лажеле и дали повторно лажете. На детето му е потребно време да ја обработи оваа вистина во својата глава. Од тука следи уште една осуда на родителите – сте ме мамеле. Ова поттикнува од уценувањето на детето со подароци кои ќе ги добие или не, ако добро или лошо се однесува„, објаснува д-р Колсон.
После лутината и бесот доаѓа разочарување, кое можеби е и најтешка емоција и тогаш треба да се остави детето да ја преболи ситуацијата и да му се пружи сета можна поддршка. Притоа, психологот советува дека на децата треба да им се даваат информациите постепено, исто како и кога го уверувате дека овој имагинирен лик постои. Само одвоварајте им на прашањата, вели д-р Колсон.
Додека се мали, тие вам главно ви сугерираат дека сакаат да им дојде Дедо Мраз и тука почнува бајката, а се случува и родителите сами на децата да им го наметнат ова верување.
„Не постојат точно одредени години во кои детето треба да ја дознае вистината за Дедо Мраз и за Северниот пол. Тоа е индивидуално од дете до дете. Најдобро е на детето да му се понуди вистината одговарајќи му на прашања со кои ќе дојде дома од градинка или училиште. Од мое искуство, децата стануваат љубопитни помеѓу петтата и седмата година. Тогаш имаат дилеми кои треба да се решат и вие како родител сте должни тоа да го направите. Не заборавајте дека знаењето е моќ. Кога детето ќе ви дојде дома од училиште со констатација дека слушнало оти Дедо Мраз не е реален, тоа всушност ви зборува дека е подготвено да ја дознае вистината. За почеток објаснете му дека и вие долго сте верувале дека тие ликови се реални и дека истото го верувале сите деца на светот, што веднаш ќе му олесни на детето„ објаснува д-р Колсон.
Тој советува да не се плашите иако детето е доволно возрасно да поставува прашања, тогаш е доволно возрасно и да ја дознае вистината.
„Помогнете му на своето дете да размислува логично и тоа ќе увиди дека се е добро реализирана магична приказна. Сепак, објаснете му на детето дека други родители можеби се уште не им ја кажале на своите деца вистината и дека поради тоа може да ја чуваат вашата мала тајна и на тој начин ќе му ги пренасочите мислите, односно ќе му дадете задача и тоа повторно добива на важност, овој пат како возрасен„, завршува психологот Џастин Колсон.
