Вестите за коронавирусот COVID-19 пристигнуваат од секаде, почнувајќи од насловните страници на весниците, па се до игралиштата на училиштата. Многу родители се прашуваат како да ја претстават пандемијата на коронавирус на начин којшто ќе биде смирувачки и нема да ги направи децата позагрижени отколку што веќе се. Во продолжение дел од советите на експертите од „Child Mind Institute“ од Њујорк
♦♦♦♦♦♦♦
„Не плашете се да разговарате за коронавирусот“, советуваат американските психолози за деца. Повеќето деца веќе имаат слушнато за вирусот или виделе луѓе како носат маски на лицето, па затоа родителите не би требало да избегнуваат да зборуваат за тоа. Да не се зборува за нешто, всушност, може да ги натера децата да се грижат повеќе. Гледајте на разговорот како на можност да ги пренесете фактите и прилагодете го тонот со кој им се обраќате. „Вие ги добивате сите вести и вие сте лицето кое ги филтрира истите пред вашето дете“, објаснува д-р Жанин Домингес, психолог за деца во „Child Mind Institute“. Вашата цел е да им помогнете на вашите деца да се чувствуваат информирано и да добиjат информации засновани на факти што веројатно ќе биде поуверливо од сето она што го слушаат од своите пријатели или од вестите.
Однесувајте се соодветно на возраста
Не претерувајте со информации. Наместо тоа, обидете се да одговорите на прашањата на вашето дете. Дајте се од себе за да одговорите искрено и јасно. Сосема е во ред ако не можете да одговорите на сè. Важно е да му бидете на располагање на вашето дете.
„Земете ги сериозно предвид индициите од вашето дете. Поканете го да ви каже сè што можеби слушнало за коронавирусот, и како се чувствува односно што мисли за тоа. Дајте им убава можност на децата да постават прашања. Вие сакате да бидете подготвени да одговорите (но не и пребрзо) на прашањата. Вашата цел е да избегнете поттикнување на застрашувачки фантазии“, советуваат стручњаците.
Не претерувајте со информации. Наместо тоа, обидете се да одговорите на прашањата на вашето дете. Дајте се од себе за да одговорите искрено и јасно. Сосема е во ред ако не можете да одговорите на сè. Важно е да му бидете на располагање на вашето дете
Тие апелираат родителите да се справат со сопствената анксиозност. „Кога се чувствувате најмногу вознемирено или во паника – тоа не е време кога треба да разговарате со вашите деца за тоа што се случува со коронавирусот“, предупредува д-р Домингес. Ако забележите дека се чувствувате вознемирено, одвојте некое време да се смирите пред да почнете разговор со децата или да одговарате на нивните прашања.
Бидете уверливи
Децата се многу егоцентрични, така што слушањето за коронавирусот на вестите може да биде доволно за да ги натера сериозно да се загрижат дека ќе го фатат вирусот. Корисно е да го уверите вашето дете колку е всушност редок коронавирусот (грипот е многу почест) и дека децата имаат поблаги симптоми.
Понатаму, фокусирајте се на она што го правите за да останете безбедни. Важен начин да ги уверите децата е да ги потенцирате безбедносните мерки на претпазливост што ги преземате. Д-р Џејми Хауард, психолог за деца во „Child Mind Institute“, потсетува: „Децата се чувствуваат помоќно кога знаат што треба да направат за да бидат безбедни“. Знаеме дека коронавирусот се пренесува претежно со кашлање и допирање на површини. CDC препорачува темелно миење на рацете како основно средство за да останете здрави. Затоа, потсетете ги децата дека самите се грижат за себе со миење на рацете со сапун и вода во времетраење на 20 секунди (или со должината на две песни „Среќен роденден“) и тоа треба да го прават секогаш кога ќе влезат однадвор дома, пред да јадат, и откако ќе го исекнат носот, после кашлање, кивање или користење на тоалетот. Ако децата прашуваат за маските за лице, објаснете им дека експертите на CDC велат дека тие не се неопходни за повеќето луѓе. Ако децата гледаат како луѓето носат маски, објаснете им дека тие луѓе се екстра претпазливи.
Држете се до рутината
„Не сакаме неизвесност, затоа останете доследни на рутината, предвидливоста е од помош сега“, советува д-р Домингес. Ова е особено важно ако училиштето или дневниот центар на вашето дете се затворени. Бидете сигурни дека се грижите исто како што би се грижеле за време на зимскиот или летниот распуст. Организирани денови со редовни оброци и време на спиење се суштински дел за одржување на децата среќни и здрави.
Продолжете да зборувате. Кажете им на децата дека ќе продолжите да ги информирате откако ќе дознаете повеќе. „Дајте им на знаење дека ‘линиите’ за комуникација ќе останат отворени“, вели д-р Домингес. „Може да кажете: Иако во моментов немаме одговори на сè, бидете сигурни дека откако ќе знаеме повеќе мама или тато ќе ве известат и вас“.
(Извор: „Child Mind Institute“)
