Психолозите објаснуваат дека самоувереното дете полесно чекори низ животот затоа што верува дека може успешно да се справи со сите предизвици што го очекуваат во животот. Исто така, многу истражувања покажуваат дека децата со висока самодоверба се подобри во училиште, но имаат и многу поуспешни кариери откако ќе пораснат, токму поради нивната верба во себе.
Но, многу родители не се ни свесни дека начинот на кој пристапуваат и разговараат со своето дете може да има големо влијание врз развојот на нивната самодоверба. Психолозите нагласуваат дека одредени реченици можат да придонесат за зајакнување на самодовербата кај детето, а еве за кои реченици и фрази станува збор.
„Гледам дека се трудиш околу ова“, е реченица која му дава до знаење на детето дека родителот го гледа и го забележува неговиот труд. Психолозите постојано нагласуваат дека најважен е трудот, додека резултатите се помалку важни. Токму ваквото забележување на заложувањето на детето и неговата волја, придонесува за подобро развивање на самодовербата.
Друга реченица која ќе му помогне на детето да стекне што поголема верба во себе е: „Знам дека следниот пат ќе успееш“. Родителите треба редовно да ја кажуваат оваа реченица на своето дете кога во нешто нема да успее, а можеби ќе сака да се откаже затоа што е разочарано.
Имено, сосема е разбирливо што одвреме-навреме се соочуваме со неуспех, а начинот на кој се справуваме со него покажува каква личност сме. На децата кои знаат дека е во ред да се прават грешки и не се откажуваат кога ќе се соочат со неуспех, не им недостасува самодоверба, додаваат психолозите.
„Ова беше храбро од тебе“, е уште една реченица која според експертите, родителите треба да им ја кажуваат на своите деца. Иако е нормално нашите малечки одвреме-навреме да се испробаат во некои работи, па во нив нема да успеат, фактот дека тие биле доволно храбри да се обидат докажува дека имаат самодоверба.
