Поново истражување на британските научници покажало дека за време на раниот развој на детето постои простор да се намали можноста за алергија на кикиритки за 77 отсто.
Моменталните препораки се дека кикиритките во мелена форма или како путер може да им се даваат на децата по шест месеци.
Внесувањето кикиритки додека се развива имунолошкиот систем може да ги намали алергиските реакции
Алергиите на храна се резултат на тоа што нашиот имунолошки систем по грешка препознава нешто што е безопасно како закана. Во некои случаи, дури и мала количина може да предизвика исклучително силна реакција која може да биде фатална.
Долго време се советуваше да се избегнува храна која може да предизвика алергии во раното детство. Некои лекари им препорачуваа на родителите да не им даваат на своите деца кикиритки до тригодишна возраст.
Меѓутоа, доказите во изминатите 15 години укажуваат на спротивното.
Наместо тоа, внесувањето кикиритки додека се развива имунолошкиот систем може да ги намали алергиските реакции.
На пример, во Израел каде што ужинките од кикиритки се вообичаени во помлада возраст, стапката на луѓе со алергии е значително помала.
Други студии покажале дека запознавањето на децата и со други „проблематични“ намирници, како што се јајцата, млекото и пченицата, исто така ги намалува шансите за развој на алергии подоцна во животот.
