Возрасните често забораваат дека децата го впиваат секој изговорен збор – дури и кога мислиме дека се занесени во играта и дека воопшто не слушаат што зборуваме. Меѓутоа, навистина треба да бидеме многу внимателни што и како зборуваме пред децата, бидејќи експертите предупредуваат дека некои коментари можат лошо да влијаат на нивниот емотивен развој и несвесно да им всадат некои штетни стереотипи.
Авторката Лора Маркам, која ја напиша книгата „Смирени родители, среќни деца“, истакнува дека не е важен само контекстот, туку и начинот на кој се зборува пред децата, па затоа, на пример, разговорот за финансиската состојба на семејството не треба да се коментира со загрижен тон, за да се избегне непотребниот стрес што може да го предизвика кај децата.
Освен тоа, обрнете внимание на овие 5 работи за кои не треба да зборувате пред децата.
1. Коментари поврзани со изглед
Семејниот терапевт Бријен Билапс Хју советува да избегнувате какви било негативни коментари за телото, бидејќи тоа може да влијае на самодовербата на децата и да ги наведе да прифатат нездрави стереотипи.
2. Критика на авторитети
Што и да мислите за другиот родител или за наставниците на вашето дете, задржете го тоа за себе. На децата им се потребни авторитетни личности, а негативното мислење за нив може да ги збуни децата, па дури и да предизвика чувство на срам.
3. Споредба со брат/сестра
Ако имате повеќе деца, никогаш не треба да ги споредувате едно со друго бидејќи кај нив предизвикува чувство на несигурност, а може и да предизвика ривалство. Маркам вели дека кон секое дете треба да се однесувате со почит кон неговата единствена личност.
4. Финансиски проблеми
Детскиот психолог Ен-Луиз Локхарт предупредува дека не треба да зборувате за вашите финансиски грижи пред децата, бидејќи тоа може да предизвика страв за безбедноста на семејството кај децата.
5. Дискусии за алкохол или дрога
Терапевтот Билапс Хју нагласува дека децата имитираат сè што гледаат и дека на рана возраст не можат да разликуваат сериозен разговор од иронија или шега. Нормализирањето на злоупотребата на алкохол или дрога, дури и во форма на шега, може да има лоши последици за децата, па затоа најдобро е да не давате коментари на оваа тема пред децата.
