Делириум придружен со треска може да биде ран симптом на COVID-19, според истражувањето спроведено од истражувачите од Универзитетот Оберта де Каталуња (UOC). Тие нагласуваат дека кај некои пациенти, покрај добро познатите симптоми, се јавува и делириум.
-
Манифестацијата на оваа состојба на конфузија, збунетост, со покачена температура, треба да се смета за рана карактеристика на болеста, особено во случај на постари пациенти
„Делириумот е состојба на збунетост во која лицето се чувствува надвор од реалноста, како да сонува. Треба да бидеме внимателни, особено во епидемиолошка ситуација како оваа, бидејќи индивидуа која покажува одредени знаци на конфузија може да биде показател на инфекција”, објасни истражувачот од UOC, Хавиер Кореа.
Кореа, заедно со истражувачот Диего Редолар Рипол, го прегледале научниот труд за ефектите на COVID-19 врз централниот нервен систем, односно мозокот. Прегледот на трудот открива дека има сè поголеми индикации дека коронавирусот влијае и на централниот нервен систем и произведува неврокогнитивни промени како што се главоболки и делириум, како и психотични епизоди.
„Главните хипотези кои објаснуваат како коронавирусот SARS-CoV-2 влијае на мозокот укажуваат на три можни причини: хипоксија или недостаток на невронски кислород, воспаление на мозочното ткиво како резултат на цитокинска бура и фактот дека вирусот има можност да ја премине крвно-мозочната бариера за директно да го нападне мозокот“, рече Кореа.
Тој истакна дека секој од овие три фактори може да резултира со делириум и објасни дека доказите за оштетување на мозокот поврзани со хипоксија се забележани на обдукциите на пациентите кои починале од инфекција и дека вирусот може да се изолира од мозочното ткиво, пренесува „Medical xpress“.
Според истражувачите, делириум, когнитивен дефицит и аномалии во однесувањето најверојатно се резултат на системско воспаление на мозокот и состојба на хипоксија, што исто така предизвикува воспаление на невронското ткиво во областите како што е хипокампусот, кои се поврзани со когнитивни дисфункции и промени во однесувањето кои се прикажани кај пациенти кои страдаат од делириум.
