Теоретски, детето може истовремено за заболи и од морбили (мали сипаници) и од варичела (овча сипаница).
“Доколку детето заболи од варичела или од морбили, треба да се изолира од браќата или сестрите, за да се намали можноста за двојна инфекција“, потенцираат лекарите.
СИМПТОМИ НА ВАРИЧЕЛА
За разлика од малите сипаници (морбили), каде исипот прво избива на лицето, при варичелата тој главно најнапред се јавува на телото. Исипот на почетокот е во форма на неколку мали црвени точки (папули) кои брзо се полнат со течност создавајќи мали меурчиња (везикули). Потоа се шират на вратот, скалпот и лицето, за да на крајот бидат зафатени и рацете и нозете. Може да биде благ исип, но може да биде и обилен и да ја прекрие целата кожа. Кога течноста во нив ќе се замати, тоа е знак дека набрзо ќе дојде до пукање. После нив остануваат красти, кои се сушат и паѓаат. Исипот завршува главно две недели по почетокот на болеста. Исклучително е важно да се спречи детето да се чеша, за да не останат лузни.
Периодот на инкубација на варичелата трае две до три недели. Тоа е времето од контактот со заразеното лице до појавата на првите симптоми на болеста. Пред карактеристичниот исип, се јавува малаксаност, замор, болка во мускулите и зглобовите, зголемена телесна температура, повраќање и главоболка. Тогаш организмот е веќе заразен, а во следната етапа на болеста, на телото се појавува исипот.
По основ на разликите кои ја следат состојбата пред појавата на исипот, се утврдува дали станува збор за морбили или варичела, објаснуваат педијатрите.
“Морибилите најпрво ги следи појава на висока температура, а може да биде присутно и течење на нос, како и конјуктивитис. Наодот на белите дробови и на грлото на детето може и не мора да биде уреден. Доколку станува збор за морбили, исипот ќе се појави три до седум дена од избивање на температурата. Во случајот на варичела, зголемената телесна температура може да биде знак за болеста, но таа не се јавува секогаш, а исипот избива за 15 до 20 дена од инфекцијата со вирусот“, објаснуваат лекарите.
СИМПТОМИ НА МОРБИЛИ
Во случај на варичела или овча сипаница инфицираниот пациент е заразен еден до два дена пред појавата на исип и не подолго од пет дена од нивното повлекување. Кај морбилите заразата се шири четири дена пред избивање исипот и до четири по неговото повлекување. Состојба која претходи на малите сипаници е исклучително висока температура и над 40 степени Целзиусови, а ја следи и кашлање, течење на нос и конјуктивитис.
“Набројаните симптоми не мора секогаш да бидат присутни, но кај повеќето инфицирани пациенти се присутни. Пред избивање на исипот, морбилите ги карактеризира и појава на ситни бели дамки во внатрешноста на образите. По три до седум дена подоцна, се јавува исипот, прво на лицето, па на останатите делови на телото“, велат епидемиолозите.
Она по што најмногу се разликуваат морбилите и варичелата се зачестеноста и сериозноста на компликациите. Додека овчите сипаници имаат поприроден тек, и ако се појави некоја компликација, тоа веднаш се препознава по тоа што болеста не поминува, кај морбилите почесто се јавува воспаление на средното уво, ларигнитис, менингитис, енцефалитис.
