Потребно:
- 500 гр мешано мелено месо
- 8 големи компири
- 2-3 лажици масло
- 1 мал кромид
- 1 чешне лук
- 1 јајце + жолчка
- 1,5 лажици стопен путер
- 1,5 лажици брашно
- 3,5 дл млеко
- 50 гр рендан пармезан
- 2 лажици доматен концентрат
- 1 лажица свеж магдонос
- Сол, бибер, оригано
Подготовка: Компирите убаво измијте ги и варете ги 15 минути додека не се до половина сварени. Додека се варат компирите, на малку масло пропржете го ситно исечканиот кромид и лукот, додадете го месото и пржете додека месото не ја промени бојата и не почне да се дели на помали грутчиња. Додадете го доматниот концентрат, магдоносот и тргнете го од оган. На путер се пропржува брашното, полека се додава млекото и се меша да не се формираат грутчиња. Оставете да зоврие, па тргнете го од оган, додадете ја жолчката и ренданиот пармезан и убаво измешајте. Во меленото месо додадете две лажици од преливот и убаво измешајте, додадете го јајцето и убаво измешајте. Загрејте ја рерната на 200 степени. Компирите процедете ги, исечете ги на половина и издлабете ги. Наполнете ги половинките со филот, прелијте ги со 2 лажици прелив, посипете со оригано и печете во рерна половина час. Добар апетит!
