Резултатите се извонредни: Колкави се шансите да се заразите со коронавирус откако сте се вакцинирале

Вакцината против Ковид-19 е една од главните алатки кои помагаат во борбата против пандемијата на коронавирус, но ниту една вакцина не е 100% ефикасна. Ова значи дека некои луѓе можат да се заразат со коронавирус дури и ако биле вакцинирани.

Дури и оние лица кои биле позитивни по вакцинирањето имале само благи симптоми на болеста или биле асимптоматски носители

Новото истражување анализирало колкави се шансите да се заразите по вакцинирањето, а резултатите покажале дека вакцините сепак добро работат. Студијата објавена во часописот „New England Journal of Medicine“ покажала колку ретки може да бидат случаите некое лице да се зарази откако е целосно вакцинирано или добило две дози од вакцината против Ковид-19.

Истражувачите прегледале повеќе од 28.000 здравствени работници во Калифорнија кои биле целосно вакцинирани. Само седум од нив, или 0,02%, биле позитивни на Ковид-19 по повеќе од две недели по приемот на втората доза на вакцината на Модерна или Фајзер.

Дури и оние лица кои биле позитивни по вакцинирањето имале само благи симптоми на болеста или биле асимптоматски носители. Д-р Дејвид Вол, специјалист за инфективни болести на Медицинскиот факултет на Универзитетот во Северна Каролина, рече дека резултатите се извонредни.

Забележан е пад на случаите откако поминало повеќе време од приемот на првата, а потоа и на втората доза на вакцината. Вкупно 145 случаи биле пријавени во првите седум дена од првата доза. „Бројот на заразени се намалуваше“, рече Вол.

• Авторите на студијата истакнуваат дека резултатите се охрабрувачки и дека „тие сугерираат дека ефективноста на овие вакцини се одржува и надвор од испитувањата“. Но, и понатаму треба придржување кон епидемиолошките мерки сè додека не се постигне колективен имунитет

Вол посочува дека треба да се биде посебно внимателен со појавата на нови варијанти на вирусот, бидејќи тие можат да ги нарушат претходните напори во сузбивање на епидемијата. Токму затоа Вол поттикнува на вакцинација бидејќи „вакцините што сега ги имаме, исто така, до одреден степен штитат и од новите варијанти“.