Според мислењето на американските офталмолози, децата кои поминуваат многу време во затворени простории пред компјутери и други електронски уреди се изложени на поголем ризик да развијат миопија или кратковидост. Инаку, во САД, бројот на Американци кои страдаат од кратковидост е речиси двојно зголемен во последните 50 години.
Се смета дека за наведениот пораст на кратковидоста се одговорни преокупацијата со нешто блиску до очите и намалувањето на времето поминато на отворено на природна светлина.
За жал, сведоци сме дека во последните 10 години децата поминуваат се повеќе време дома окупирани со своите мобилни телефони, таблети и компјутери. Играњето игри на овие уреди е особено опасна ситуација за видот, бидејќи нивните очи тогаш се многу блиску до тие уреди при многу слаба осветленост.
Се разбира, секој може да биде кратковид, но миопијата сепак е почеста кај децата чии родители се исто така кратковиди. Исто така, миопијата е многу почеста во индустријализираните и урбаните области отколку во руралните области. Околу 42 отсто од Американците на возраст меѓу 12 и 54 години се кратковиди.
Иако миопијата не е реверзибилна, па дури и не може да се запре, нејзината прогресија може да се забави.
Се препорачува децата кои поминуваат многу време пред компјутер или други електронски уреди да прават пауза од 20 секунди на секои 20 минути, при што ќе гледаат во некој далечен предмет/објект.
Извор: American Academy of Ophthalmology
