Истражувањата покажуваат дека постојаното користење на мобилен телефон кај родителите може сериозно да го попречи емоционалниот развој на децата. Последиците не се гледаат само во ослабена емоционална регулација и самосвест кај децата, туку и во нарушен авторитет на родителите, послаба семејна поврзаност и негативна атмосфера во домот.
Родителите кои несвесно стануваат „мобилни зомбиња“ често не забележуваат колку нивните навики го обликуваат семејниот живот.
Присуството на мобилен телефон го намалува квалитетот на односите
Студија објавена во списанието Scientific Reports открива дека дури и самото присуство на мобилен телефон за време на разговор или оброк може да го намали квалитетот на односот. Родителите кои поминуваат премногу време пред екранот можеби ни не забележуваат колку тоа ги оддалечува од сопствените деца.
11 секојдневни ситуации каде мобилниот телефон создава дистанца:
1. Скролaње за време на семеен оброк
Заедничките оброци се важни за блискост, сигурност и отворена комуникација. Психотерапевтката Ане Фишел вели дека децата кои редовно јадат со родителите имаат подобри оцени, посилни пријателства и постабилни емоции. Кога родителите скролaат додека јадат, ја губат шансата за поврзување.
2. Снимање на секој момент
Постојаното снимање наместо активно учество во игра, прошетка или домашен момент ја нарушува природната поврзаност. Освен што го прекинува контактот со очите и разговорот, често се споделуваат и премногу приватни моменти на интернет.
3. Површно слушање
Многу родители слушаат со „половина уво“ додека гледаат во екранот. Но, според студија во Current Opinion in Psychology, полното внимание е клучно за здрав однос. Недостатокот на фокус кај родителот создава чувство на невидливост и емоционална отуѓеност кај детето.
4. Телефонот наместо насмевка по училиште
Кога детето доаѓа дома, а родителот го дочекува со поглед во екранот, се губи можноста за поврзување. Иако често се работи за обврски, прашањето останува: што е поважно – пораката или моментот со вашето дете?
5. Шетање без присуство
Да сте физички присутни, но умствено отсутни, може да биде полошо од тоа да не сте присутни воопшто. Дури и кратка прошетка станува можност за разговор — ако не сте на телефонот.
6. Телефонот како замена за родител
Кога мобилен или таблет се користат за смирување или забава, детето добива порака дека удобноста е поважна од интеракцијата. Истражувањата покажуваат дека претераното време пред екран штети не само на когнитивниот, туку и на емоционалниот и социјалниот развој.
7. Споделување наместо уживање
Родители кои објавуваат сè што прават со децата често забораваат да уживаат во тие моменти. Успоредувањето со други семејства онлајн може да создаде незадоволство и да ја наруши автентичната врска со сопствените деца.
8. Телефонот поважен од детската потреба
Ако детето бара внимание, а родителот одговара со „молчи сега“, тоа учи дека не е важно. Прво се јавува интензивно барање внимание, а подоцна повлекување и фрустрација.
9. Пропуштање мали, но вредни моменти
Првите чекори, спонтаното смење или игра во дневна — тоа се моментите што остануваат во срцето. Родители кои постојано се на мобилен често не ги ни забележуваат.
10. Критикување дете за екран — додека вие сте на екран
Ако родителот го прекорува детето за телефонот, а самиот постојано е на својот, испраќа збунувачка порака. Детето учи од однесување, не од зборови.
11. Игнорирање емоции
Ако детето има емоционален испад, а родителот се „скрие“ зад екранот, детето останува само со своите чувства. Така се избегнува решавањето на проблемот, а се испраќа порака дека емоциите не се важни.
Малите промени носат големи резултати
Родителите често не се свесни колку телефонот влијае врз секојдневието на семејството. Но дури и мали промени — како тргање на телефонот за време на оброк или целосно слушање на детето — можат да имаат големо позитивно влијание.
Клучот за здрав однос не е перфекција, туку присутност. А на децата најмногу им треба да бидат видени, слушнати и сакани.
