“Интелегенцијата не е наследна, се наследува само потенцијалот кој треба да се активира, а во таа смисла најважна е раната стимулација во првите години од животот на детето, додека најголемо влијание на него имаат токму родителите“, истакнува д-р Рајко Рајовиќ, автор на НТЦ системот на учење кој што се применува во градинките и училиштата во 14 земји во Европа.
Кои се вообичаените грешки што ги прават родителите кои можат негативно да влијаат на природниот развој на интелигенцијата на детето:
Розова соба
Бебето во првиот месец гледа сè матно, како да има диоптрија +20 и забележува единствено силни контрасти. Наместо еднолични, розови или сини ентериери, во детската соба, барем во тој прв период, треба да се стават темни завеси или тапети кои што ќе бидат контраст, вели д-р Рајовиќ.
- Спречување на игра на под
Додека детето лази, со рацете се потпира на подот, а таквиот притисок на дланката активира одредени делови од мозокот кои се важни за подоцнежната интелигенција. Некои родители брзо го подигаат детето од подот, не сакаат да се извалка или да со рацете да стави во устата некоја нечистотија или нешто што ќе го најде на подот. Сепак, фазата на лазење е многу кратка и ако тогаш не дојде до специфична стимулација на дланката, се пропушта добра можност за развој на мозокот.
- Забрана за скокање по кревет
Невроните кои не работат умираат, а токму невроните природно ги поттикнуваат децата да скокаат. Секој скок го поместува тежиштето на телото налево или надесно, па тогаш мораат да ги активираат сите мускули за да одржат рамнотежа кога се враќаат на нозе, а управувањето со тоа е активност на мозокот. “Наместо да му забранувате на детето да скока, внимавајте на безбедноста. А ако навистина сакате да го поттикнете развојот на интелигенцијата на детето, родете му брат или сестра, бидејќи едно дете ќе скока пет минути, а две заедно ќе скокаат заедно пет часа“, порачува д-р Рајовиќ, кој напоменува дека слично на скокањето, функционира и кога детето се врти околу својата оска, по што децата понекогаш и паѓаат.
Возење во количка наместо пешачење
Пешачењето е многу важно за развојот на мозокот, а многу родители денес ги возат своите деца во колички додека не наполнат четири или пет години. Покрај влијанието врз когнитивниот развој, долгото туркање на децата во колички доведува и до појава на спуштени стапала, што денес веќе имаат околу 70 отсто од децата. Децата секако треба да одат што повеќе, а идеално е, кога постојат услови, да одат боси.
Дури и да имало пропусти во првите години, напоменува д-р Рајовиќ, родителите се уште можат да го поттикнат развојот на интелигенцијата кај своето дете од предучилишна возраст или ученик преку разни вежби и игри.
