Руската вакцина против КОВИД-19, Спутник-V, предизвикала создавање на антитела кај сите учесници во раната фаза на клиничките испитувања, покажале резултатите од истражувањето, објавено вчера во медицинското списание The Lancet.
Резултатите од двете испитувања, спроведени во јуни и јули годинава на вкупно 76 учесници, покажале дека 100 проценти од учесниците развиле антитела кон новиот коронавирус и немаат сериозни несакани ефекти, пишува весникот.
„Двете 42-дневни испитувања, во кои беа вклучени 38 здрави возрасни лица, не покажаа никакви сериозни штетни последици меѓу учесниците и потврдија дека кандидатите за вакцини развиле антитела“, наведува The Lancet.
„Потребни се големи, долгорочни испитувања, вклучувајќи споредба со плацебо групата и следење, за да се утврди долгорочната безбедност и ефикасност на вакцината за спречување на зараза со КОВИД-19“, се додава во написот.
Првите резултати од масовното испитување на руската вакцина, кое започна минатата недела, се очекуваат во октомври или ноември. Ќе опфати 40.000 луѓе, а 3.000 веќе се пријавиле.
