Наредувањето е само еден израз на егоцентричноста на детето, бидејќи на таа возраст се смета себеси за најважната личност на светот. Таквото дете сака работите да се одвиваат на негов начин и природно е да сака малку контрола во својот живот кој е целосно под контрола на другите. Како што ќе расте, детето ќе сфати дека светот не се врти околу него и колку повеќе ќе има контрола над работите, однесувањето ќе се ублажи.
Детето можеби плаче за ваше внимание
Освестете како се однесувате кон детето, бидејќи ако вие нему постојано му наредувате, немојте да се чудите што го прави истото, советуваат детските психолози. Децата често нè пресликуваат. Ова однесување понекогаш е крик за вистинско внимание. Реагирајте кога вашето дете ќе побара нешто од вас, посветете му се и бидете што е можно повеќе присутни кога сте заедно. Ако не можете веднаш да реагирате, секогаш објаснете зошто е тоа така и кажете точно кога ќе можете, а потоа држете се до тоа.
Дајте му на детето малку контрола во форма на едноставни избори во текот на денот. Ова ќе му даде чувство дека има надзор над својата околина, па нема да се обидува целосно да ја преземе контролата и да ја бара со наредување или командување.
Не правете наместо детето нешто што тоа може само
Кога детето од вас ќе побара да направите наместо него нешто што може самостојно да го направи, не правете го тоа. Објаснете му дека правите многу за него, но дека некои работи може да ги направи сам и дека нема потреба вие да го правите тоа за него.
Поттикнете ја самодовербата кај детето и кога ќе направи нешто самостојно, пофалете го за вложениот труд. Прифатете дека желбата детето да биде главно можеби не е дел од неговиот карактер, туку развојна фаза, па дури и да е, обидете се да ја насочите оваа потреба во позитивна насока.
