Се остваруваат ли стравувањата дека смртоносната инфекција може да се скрие во човечките клетки и повторно да се реактивира?
♦♦♦♦♦♦♦
Педесет и еден пациент кои оздравеле од коронавирус во Јужна Кореја се повторно позитивни на тестот за Ковид-19, зголемувајќи ги стравувањата дека вирусот може да се реактивира.
Пациентите, кои се од најтешко погодениот град во земјата, Даегу, биле ставени во карантин откако биле дијагностицирани со вирусот, а потоа повторно биле позитивни на тестот, неколку денови откога биле пуштени од карантинот.
Од Центарот за контрола и превенција на болести во Кореја (KCDC) соопштија дека поверојатно е дека вирусот е „реактивиран“, отколку дека пациентите повторно се заразиле.
Научниците од здравственото тело, управувано од владата, веруваат дека вирусот може да се „успие“ во недетектирани нивоа на човечките клетки. Тие велат дека од непознати причини вирусните честички можат да се реактивираат – но не е јасно дали пациентите повторно стануваат заразни.
Експертите објаснуваат дека нема докази за да се докаже дека вирусот делува на овој начин, а студиите кај мајмуните всушност го покажале спротивното.
Додаваат дека во случаи кога пациентите двапати даваат позитивен резултат на тестот за Ковид-19, тоа е затоа што тестот може да даде погрешен резултат, што се случува кај еден од пет случаи.
Пол Хантер, професор по заразни болести на Универзитетот во Источна Англија, за MailOnline изјави: „Се согласувам дека не се работи за реинфекции, но не мислам дека се реактивирања. Лично, мислам дека најверојатното објаснување е дека примероците биле лажно негативни“.
Професорот Хантер потенцира дека конвенционалните тестови за коронавирус може да дадат погрешен резултат кај 20 до 30 проценти од случаите. Тој верува дека тестовите што ги направиле пациентите во Јужна Кореја пред да бидат отпушени од карантин погрешно покажале дека оздравеле, а тие всушност биле се уште заразени.
Генералниот директор на KCDC Jeонг Еун-кјонг изјави дека тим на истражувачи е веќе испратен во Даегу, регионот најтешко погоден од коронавирус, за да спроведе епидемиолошка истрага за случаите.
Извор: „Дејли мејл“
