Лицата кои имаат проблем со мигрена, може да почувствуваат засилени тегоби кога нагло ќе затопли или ќе залади.
Чувството на пулсирање во слепоочниците и неиздржливата болка во главата се типични симптоми на мигрена. Податоците говорат дека секој десетти жител на плантета има напади на мигрена што се повторуваат. Обично се поврзува со возрасните, меѓутоа и децата и адолесцентите може да страдаат од оваа напорна состојба.
Мигрената кај децата се уште претставува голема непознаница. Кај децата, но и кај родителите, таа често предизвикува страв. “Нешто ми тропа во главата“ или “ми чука срцето во главата“, тоа се најчестите реченици со кои децата ги опишуваат теговите и болката што ја чусвтвуваат.
- Како се манифестира
Мигрената кај децата најчесто се манифестира со силна, пулсирачка главоболка во пределот на челото, очите и слепоочниците, а се е проследено со мачнина и повраќање.
Се дели на две форми: мигрена со аура и без аура. Аурите можат да бидат визуелни, со блесоци на светлина или линии во видното поле.
“Еден цел ден, пред да започне главоболката, детето се жали на често проѕевање, замор, поспаност, има чести промени во расположението, дури покажува агресивност и депресија, зголемена потреба за слатки или течности“, вели проф. д-р Јасна Јанчиќ.невропсихијатар.
- Каква е терапијата
Бидејќи не постојат специфични тестови за препознавање на мигрена, лекарот може само да дијагностицира и да ја одреди соодветната терапија преку детален невролошки преглед и разговор со детето и родителот.
“Ако зборуваме за акутна терапија, можеме да се одлучиме за таканаречената стратификувана терапија, каде што ќе даваме одреден тип на лек во зависност од тежината на болката или да се одлучиме за терапија чекор по чекор: каде прво ќе одиме со поблаги лекови како ибупрофен или бруфен“, објаснува д-р Јанчиќ.
Таа додава и дека доколку главоболката не помине, се преминува на специфични лекови, кои покрај тоа што доведуваат до престанок на мигрената, ја спречуваат и останатата симптоматологија: повраќање, мачнина, фото и фоно-фобија.
- Кои се тригери
Тригери или предизвикувачи за напади на мигрена, покрај наследните предиспозиции, може да бидат и промените во секојдневната рутина – прескокнати оброци, прекумерна физичка активност, недостаток на сон, дехидрација или стрес.
Во борбата против мигрената, хронично заболување кое започнува во детството и може да трае цел живот, помагаат здрав начин на живот, адекватна терапија и едукација на родителите.
