Со оглед дека повеќето бебиња се раѓаат во породилиште, неговото прво излегување е патот до дома. Од болница ќе излезете кога ќе бидете отпуштени, без разлика дали е лето или зима, ветровито, врне дожд или снег. Но, добро средено, бебето нема ни да забележи дека кусо било надвор.
- Како да го подготвите домот за доаѓањето на бебето?
Просторот во кој ќе престојува по излегувањето од болница треба да биде чист и удобен. Тоа значи дека не е задушливо и температурата на воздухот да е соодветна.
За новороденче температурата на околината е термонеутрална, со релативна влажност од 50 проценти, без струење на воздух, од 31 до 34 степени кога детето е голо, а околу 24 степени кога е обично облечено и покриено со памучно ќебе.
- Како да знаете дали на бебето му е студено или топло?
Допрете ги рацете и нозете. Ако се студени и сини, за бебето е многу студено.
- Што да направите ако на бебето му е жешко?
Доколку собата е многу загреана, лицето на бебето ќе се зацрвени и главата му се поти. Тоа значи дека му е многу жешко. Треба да го пресоблечеѕе да не се поти, удобно да го доите, а температурата на околината да се намали.
- Кога да го однесете бебето на проштетка?
Има луѓе кои бебето родено во зима, до април не го изнесуваат надвор, за да не настине. Меѓутоа, ова не е добро од неколку причини. Прво, бебето полесно ќе настине во мал простор каде што влегуваат возрасни и постари деца, што носи различни причини за инфекција. Второ, не е здраво да се дише застоен воздух, и трето и најважно: детето треба да се навикне на условите на средината во која ќе го помине целиот свој живот! Тоа значи дека бебето треба да се прошета во зима, но откако ќе се обезбедат одредени услови.
Бебе помало од шест недели можете да го изнесете надвор и да шетате со него само ако надворешната температура е над 15 степени и ако е убав, стабилен ден, без ветер и треба да биде соодветно облечено. Доколку е постудено, почекајте да наполни шест недели, бидејќи во тој период созрева терморегулацискиот центар во мозокот, па бебето можете да го изнесете на нула степени на половина час – под услов да е убав денот, без ветер, а бебето да се добро облечено.
- Што ако бебето настине?
Настинката е блага болест, предизвикана од бројни респираторни вируси кои ги зафаќаат горните дишни патишта. Првиот знак е затнат нос. Постарите деца често имаат воспаление на грлото. Тоа е затоа што во грлото има лимфни јазли каде се одвива борбата против „напаѓачите“ – така што одбранбените клетки ги „пресретнуваат“ микробите за време на настинка и го спречуваат нивното навлегување во долните дишни патишта. Температурата ретко е покачена, а детето ја задржува нормалната активност и апетит.
- Како да го исчистите носот на бебето?
Носот мора да се чисти пред секој оброк, а доколку е потребно и почесто. Тоа се прави со физиолошки раствор што се продава во аптеките – и се вбризгува директно во носот на бебето. Лековите во форма на капки за нос не се даваат на новороденчиња. Чистењето на носот со стапчиња обично не е ефикасно, додека аспираторот е добар ако се користи правилно, според дадените упатства. Не се препорачува назална пумпа пред тримесечна возраст.
Бебе на кое му тече носот, обично кашла бидејќи му тече низ грлото и ги иритира рецепторите за кашлица. Додека бебето е во добра општа состојба (весело, заинтересирано, добро јаде), не треба да брзате кај лекар. Меѓутоа, појавата на густ, зелен секрет во носот, одбивањето на храна, покачената температура, болката во увото, повраќањето, а особено отежнато дишење, сина кожа и општа слабост – бараат лекарски преглед. Инаку, вообичаено е столицата на бебе кое има секрет во носот да содржи слуз што ја голта и ја исфрла преку цревата.
Настинките се нормален начин на стекнување имунитет, па морате да ги поминете за да стекнете отпорност на висури кои се околу нас. Настинките обично не траат повеќе од една недела, а поминуваат спонтано, без лекување.
