Иако изостанокот на менструален циклус е еден од најочигледните знаци на бременост, многу жени веќе неколку дена пред тоа чувствуваат промени во телото. Некои од тие симптоми можат да бидат многу суптилни и лесно се мешаат со предменструален синдром, замор или стрес.
Чувство на замор и исцрпеност
Еден од најчестите рани симптоми на бременост е ненадеен замор. Многу жени во првите недели чувствуваат дека се необично исцрпени, дури и ако спиеле доволно.
Ова се случува поради зголемувањето на нивото на прогестерон – хормон кој телото го произведува за да ја поддржи бременоста. Исто така, телото почнува поинтензивно да работи за да ја развие плацентата и да го поддржи растот на ембрионот, што дополнително ја троши енергијата.
Осетливи и отечени гради
Промени во градите често се појавуваат многу рано – веќе во рок од една недела по зачнувањето. Градите може да станат осетливи, отечени, потешки од вообичаено, а брадавките потемни и поизразени.
Станува збор за хормонални промени кои го подготвуваат телото за идното доење. Овој симптом може да потсетува на вообичаени промени пред менструација, но кај бременоста тие се обично поизразени и траат подолго.
Лесно крвавење или „спотинг“
Некои жени во рана бременост доживуваат имплантациско крвавење, што се случува кога оплоденото јајце се вгнездува во слузокожата на матката. Обично се работи за бледо розов или кафен исцедок кој трае од еден до три дена.
Поради тоа, жените понекогаш мислат дека се работи за почеток на менструација, но крвавењето е обично многу послабо и пократко.
Промени во расположението
Рано во бременоста нивото на хормони брзо расте, што може да предизвика ненадејни и неочекувани емоционални состојби – од солзи без причина до нагла раздразливост или чувство на анксиозност.
Ако почувствувате дека вашите емоционални реакции не се вообичаени, а менструацијата ви доцни или се приближува, можно е да се работи за еден од првите знаци на бременост.
Почесто мокрење
Зголемената потреба за мокрење може да се појави веќе во раните фази на бременоста, иако почесто се поврзува со подоцнежните тромесечја. Причината е зголемен проток на крв низ бубрезите и зголемено ниво на хормонот hCG, што го стимулира работењето на бубрезите.
Многу жени забележуваат дека мора да мократ и навечер, дури и ако не пиеле многу течности.
Засилен осет на мирис и промени во апетитот
Многу трудници многу рано забележуваат нетипични реакции на мириси – она што порано им било пријатно може да стане одбивно, а некои мириси може да предизвикаат мачнина. Истото важи и за апетитот – одеднаш имаат желба за одредена храна или пак одбивност кон јадења што порано ги сакале.
И ова е резултат на хормоналните промени и обично се засилува како што напредува бременоста.
Блага мачнина или „чудно чувство во желудникот“
Иако мачнината најчесто се јавува помеѓу 5. и 6. недела од бременоста, некои жени ја чувствуваат и порано. Може да се појави како блага непријатност, тежина во желудникот или слаб губиток на апетит – особено наутро или кога се гладни.
Мачнина без повраќање може да биде еден од првите сигнали на бременост кој често се занемарува бидејќи не е доволно изразен.
