Летото е период од годината кој изобилува со свежо овошје и зеленчук, па затоа сега е вистинско време да почнете со подготовка на зимница за вашето дете, односно залихи на храна за да во зимскиот период детето јаде вкусно и разновидно.
Процесот на подготовка и замрзнување на домашната храна за бебиња е едноставен.
Купете овошје или зеленчук што сакате да го готвите. Измијте го, иситнете го и сварете го во малку вода или уште подобро на пареа. Ставете малку од водата во која се варел зеленчукот или овошјето и во блендер измиксирајте (тоа може да го направите и додека намирниците се топли, не мора да чекате да се оладат). Добиеното пире ставете го во калапи за мраз. Кога ќе се замрзне, префрлете ги ледените коцки од кашичката во обележани пластични кеси и ставете ги во замрзнувач.
Но, како и со останатата домашна храна, постојат некои мерки на претпазливост кои треба да ги имате предвид. Препорака е секогаш да замрзнувате свежи и квалитетни плодови или месо. И секако водете сметка за сигурноста, секогаш измијте ги рацете и темелно измијте ги производите што ги користите. Добро сварете го месото за да избегнете контаминација со бактерии.
Исто така, никогаш не треба да замрзнувате храна која содржи претходно замрзнато мајчино млеко. Многу родители мешаат мелко во кашичките, но ако тоа е мајчино млеко кое веќе претходно било замрзнато, па одмрзнато, никако немојте да го замрзнувате повторно.
Секогаш водете сметка за рокот на траење, кој зависи од видот на храната што сте ја замрзнале. Откако овошјето или зеленчукот е сварен и замрзнат како оброк, треба да се чува во замрзнувач не подолго од три месеци, бидејќи во тој период единствено ги задржува прехранбените вредности. Истиот рок важи и за јадења кои содржат месо.
Најдобар начин да се одмрзнат замрзнатите кашички е преку ноќ да се остават во фрижидер. Се што нема да се искористи во рок од два дена, треба да се фрли, слично како кај купечките кашички. Храната од фрижидер може да се загрее така што ќе се стави во сад, кој потоа ќе се стави во чинија со топла храна.
Родителите мора да бидат претпазливи доколку користат микробранова печка, бидејќи тогаш храната нерамномерно се загрева. Проверете дали храната доволно се оладила пред да му ја дадете на бебето или детето.
