Тинејџерите се приковани за мобилни телефони, а тоа им штети на здравјето, предупредува нова британска студија. Експертите од Институтот за психијатрија, психологија и невронаука на Кралскиот колеџ во Лондон открија дека тинејџерите кои поминуваат премногу време на паметни телефони имаат поголема веројатност да бидат анксиозни, депресивни или да страдаат од несоница.
Речиси половина од тинејџерите, 657 од нив, кои изјавиле дека се нездраво преокупирани со своите паметни телефони, исто така изјавиле дека имаат симптоми на анксиозност (43%), додека некои од нив се жалат на симптоми на депресија (56%). Тинејџерите кои премногу користат мобилни телефони исто така воочуваат дека лошо спијат. Дури 64% од нив пријавиле симптоми на несоница.
Авторите на студијата открија дека најпопуларните стратегии кај младите за да се ограничи употребата на паметни телефони вклучува ставање на телефонот во тивок режим, исклучување на известувањата, користење на авионски режим и оставање на телефоните во друга просторија додека спијат.
„Утврдено е дека голем број тинејџери прекумерно користат паметни телефони. Добро е што се свесни за ова, но проблемот е што тешко се ослободуваат од оваа навика, поради што се изложени на развој на симптоми на анксиозност и депресија“, коментира професорот Бен Картер.
Паметните телефони се забавни и корисни, но можат да предизвикаат зависност. Важно е да се даде пример за децата и да се развие култура на ограничувања за користење на паметни телефони.
