На многу жени, бременоста и сексот никако не им се споиви. Но, ако со бременоста се е во ред и гинекологот не забранил интимен однос, идните родители слободно може да уживаат во интимноста, доколку тоа и двајцата го сакаат. Дотолку повеќе, што на крајот на бременоста, многу лекари советуваат полов однос. Имено, интимноста може да поттикне создавање на окситоцин – хормон кој ги контролира трудовите контракции. Освен тоа, семената течност на мажот може да го омекне грлото на матката и со тоа да поттикне отворање. Но, доколку кај трудната жена е дијагностицирана предлежечка постелка или за време на бременоста имало вагинални крварења, зачестени инфекции на уринарниот тракт, во тој случај интимен однос не е препорачлив. Во секој случај, ако жената има било каков сомнеж, најдобро е да разговара со својот матичен гинеколог и секако со својот партнер.
Уште едно правило кое никако не треба да се заборави е дека, без оглед дали лекарот дозволува или не интимни односи, бремената жена треба да го слуша своето тело и чувства, а партнерот треба да разбере доколку таа не сака сексуален однос и чувствува непријатност.
“Бременоста треба да се сфати како природна состојба и така да се однесува. Значи, трудницата може и треба да се држи до своите вообичаени активности, може да остане работно активна, да се занимава со умерен спорт. Интимните односи се дозволени, но сето тоа, секако се однесува на уредна бременост“, нагласуваат гинеколозите.
Намалување на либидото
Во бременоста може да дојде до намалување на либидото, од почеток поради мачнини и повраќање, а подоцна поради стравот од тоа дека може да го повредите бебето, поради болки во грбот и други појави, кои не одат рака под рака со вашиот интимен живот. Но, намаленото либидо во бременоста сосема е нормално, па ако и по разговорот со партнерот се уште не сакате односи,најдете друг начин да останете блиски и интимни.
