Доколку работите на потомство, сигурно знаете дека идеален период за секс е пред и за време на вашите плодни денови, а гинеколозите често препорачуваат редовен секс во текот на целиот месец.
Според ново истражување, поголема сексуална активност, во било кое време, дури и во неплоден период, може да ги подобри шансите за зачнување. Триесет жени учествувале во истражување со наслов WISH – Women, Immunity and Sexual Health, предводена од Тиерни Лоренц, научник од Кинси Институтот за истражување на секс, пол и репродукција на Универзитетот во Индијана.
„Вообичаената претпоставка е дека партнерите кои работат на дете треба да имаат редовен однос за да ги зголемат шансите на жената да забремени, дури и за време на таканаречениот неплоден период, иако не беше јасно зошто. Ова истражување е прво што откри дека сексуалната активност предизвикува производство на тип на имунитет кој го поддржува и олеснува зачнувањето и бременоста“, вели Лоренц.
Имено, редовниот секс менува одредени видови Т-лимфоцити, кои делуваат како одбранбен механизам на телото.
Истражувачите собрале примероци од плунка од 30 здрави жени кои не биле во менопауза, од кои 16 апстинирале од секс и 14 биле сексуално активни, во текот на сите фази од менструалниот циклус; менструација, фоликуларна, овулаторна и лутеална фаза.
За време на лутеалната фаза на менструалниот циклус, кај сексуално активните жени пронајдени се значително повисоки нивоа на т.н „помошни“ Т-лимфоцити тип 2, кои му помагаат на телото да ги прифати сите промени што се случуваат за време на бременоста. Исто така, кај истите жени, за време на фоликуларната фаза на менструалниот циклус, тие откриле повисоки нивоа на „помошни“ Т-лимфоцити, но од тип 1, кои делуваат како одбранбен механизам на телото против болести.
