Малите деца често се болни. Се разболуват 7 до 10 пати годишно. За среќа, нема секоја настинка да премине во нешто посериозно, а ни ви претставуваме низа практични и едноставни совети кои можат да спречат ширење на настинката и да му помогнаат на детето да се чувствува подобро и без примена на лекови.
Доволен внес на течности
Течноста ја разредува густата слуз која на децата им го отежнува дишењето, а им помага и да останат доволно хидрирани. На бебето нудете му мајчино млеко или формула почесто, а на постарите деца овозможете им со нив секогаш да имаат шише вода или незасладен чај од билки. Избегнувајте засладени напивки бидејќи шеќерот дополнително го нарушува веќе ослабениот имунитет.
Редовно чистење на носниот секрет
Бебињата и малите деца се уште не знаат сами да го дуваат носот, па затоа е важно редовно да им го чистите, особено за време на настинки. Можете да користите рачен аспиратор.
Педијатрите препорачуваат и чистење на носот со физиолошки раствор. Детското носе може да го исчистите со натопена газа или да го капнувате во секоја ноздра, па да го избришете секретот што ќе излезе.
Домашна пилешка супа
На децата кои започнале со дохрана, згответе им домашна пилешка супа и во неа додадете зеленчук како моркови, целер, келераба, пашканат и кромид. Пилешката супа е добро познат природен лек против настинка бидејќи освен што помага во намалување на воспалението во телото, топлата супа ја раствора слузта во носот и грлото и го олеснува дишењето на детето.
Корисна пареа
Пуштете жешка вода во када или од туш и затворете ја вратата за да ја наполните просторијата со пареа, а потоа останете со детето во тоалетот 10 до 15 минути за да пареата му помогне да се раствори слузта во неговото носе или грло. Во просторијата каде што престојувате со детето, направете чај од цвет од камилица и оставете го испарува.
Бања и масажа
Млаката вода може да помогне да се намали благата телесна температура и да ја олесни детската нелагодност поради настинката. Бањите искористете ги за лесно масирање на грбот на детето и градниот кош со мек сунѓер или газа.
Лесното тапкање по грбот може да му помогне и при искашлување на насобраниот секрет.
Квалитетен одмор
По топлата бања и чисење на носот од секрет, времето е идеално за малку одмор или сон. На настинатото дете ќе му биде потребна вашата близина повеќе од вообичаено, па галењето и утехата му се потребни и корисни. Одморот го зајакнува имунитетот и му помага на телото да се ослободи од болести, па инсистирајте на побавна игра и активности пто вклучуба повеќе лежење и одморање.
Кога е време за посета на лекар?
Понекогаш обичните настинки може да преминат во посериозни состојби кои бараат посета на педијатар. Ако вашето дете развие висока температура што се зголемува, задолжително контактирајте го вашиот лекар за да ви препише соодветни супозитории или сируп за намалување на температурата.
Ако детето повеќе од една недела многу кашла, тешко дише или е помалку мокри, задолжително контактирајте со педијатар.
И запомнете дека настинките се вообичаени кај децата бидејќи децата така го градат својот имунитет и генерално не се причина за паника и грижа.
