Бебињата плачат, и тоа е она што, меѓу другото, и треба да го прават. Плачењето е нивниот единствен начин да кажат што им е потребно и како се чувствуваат. За среќа, повеќето бебиња кои неутешно плачат не се болни, туку би рекле дека се премногу стимулирани од надворешниот свет на кој сè уште се навикнуваат.
Како изгледа неутешното плачење?
Неутешното плачење е, како што кажува името, кога бебето плаче и никако не можете да го смирите. Најчесто ви се чини дека не постои реална причина за овој вид на плачење и не можете да откриете која е причината за овој вид на вознемиреност.
Затоа, користењето на методот „5 чекори за смирување на вашето бебе“ (повивање, положба на стомак, шум, лулање и цицање) може да биде многу корисно. Но, што да направите ако вашето дете одеднаш плаче неутешно, а овој метод не помага?
Препорачуваме да започнете со методот „5 чекори за смирување“. Но, доколку неутешното плачење е придружено со други физички симптоми, време е да посетите педијатар за да го прегледа детето.
Симптоми на кои треба да обрнете внимание
- ако плачот е потивок, но е придружен со зачестено стенкање
- продорен плач (висок и остар, за разлика од вообичаениот звук на плачење на вашето бебе)
- ако бебето повраќа повеќе од 5 пати на ден во поголема количина или ако содржината на повраќањето има зелена или жолта боја)
- ако сте забележале промена во бојата на столицата (запек или дијареа, со траги од крв)
- ако бебето се грчи и се искривува за време на хранењето, ако веднаш по хранењето почнува да плаче
- ако има покачена температура, повисока од 37,5 ректално
- ако е летаргично (кога бебето ќе се смири, ако спие двојно подолго од вообичаеното, делува отсутно или не сака да се дои како и вообичаено во текот на 8 до 12 часа)
- ако можете да ја видите испакнатата фонтанела
