Нормално е здравите деца да имаат до 12 вирусни инфекции годишно во првите неколку години од животот. Исто така, не е ретка појава да веднаш по закрепнувањето повторно се разболат, па често на родителите им се чини дека нивното дете е постојано болно. Како што растат, зачестеноста на разболување со вирусни заболувања обично се намалува.
Благите вирусни инфекции или настинки кај повеќето деца не бараат посета на педијатар и повеќето поминуваат за пет до седум дена. Доколку траат подолго или симптомите се влошат, во тој случај е задолжителен преглед. За да се избегнат можните компликации, важно е да се реагира на првите симптоми.
Најдобар третман е исклучиво квалитетен одмор дома за да може организмот што побрзо да закрепне и да се избори со болеста. Покрај горенаведеното, има уште неколку работи кои можат да му помогнат во првите денови од инфекцијата.
Ова вклучува давање доволно течности, дозволување на детето да се одмори и давање лекови против болка и температура доколку е потребно. Парацетамол и ибупрофен се земаат ако детето има температура над 38. Можете да ги давате и ако премногу го боли грлото, увото или главата, но малку намалете ја дозата. Доколку и покрај горенаведеното, состојбата не се подобри или симптомите се влошат, не го одложувајте одењето на лекар.
