Следниот пат кога ќе се соочите со ситуација која е фрустрирачка за вас, важно е да одвоите еден момент и да вдишете длабоко, а токму на тоа нè учи “mindful“ родителството.
Како изгледа mindful родителство
Mindfulness е живеење во моментот. Тоа значи дека сте свесни каде се наоѓате, што мислите и како се чувствувате, однадвор и одвнатре. И не само тоа, mindfulness се однесува и на тоа како гледате на светот – со помалку осудување и повеќе прифаќање. Идејата за воведување на свеста во сегашниот момент е сржта на будистичката медитација, практикувана и изучувана со векови.
Идејата за свесно (mindful) родителство постои од 1997 година и во суштина се заснова на воведување на принципите на свесност во многу семејни ситуации кои понекогаш прават да се чувствувате фрустрирано.
Овој тип на родителство е промислена реакција на однесувањето или постапките на вашето дете. Негувањето на односите на овој начин може да помогне да се зајакне врската помеѓу детето и родителот.
Ова не значи дека секогаш треба да размислувате позитивно, бидејќи родителството не е само среќа и радост. Станува збор за тоа да навистина се ангажирате во сегашниот момент и да не дозволите емоциите или траумите од минатото или иднината да влијаат на вашето искуство и, уште поважно, на вашата реакција. Можеби и понатаму ќе одговорате со лутина и фрустрација, но не автоматски.
Три основни фактори на “mindful“ родителство
Свесното родителство се заснова на три клучни фактори, а тоа се: свесност и обрнување внимание на сегашниот момент, насоченост и разбирање на однесувањето и на трето место, неосудувачки, сочувствителен и прифаќачки став како одговор. Што точно значи ова?
Со цел дополнително да ги објасниме трите клучни фактори, треба да сфатиме дека свесното родителство вклучува и одредени вештини:
- Слушање
Тоа значи дека навистина ја слушате другата страна и и посветувате целосното внимание. Ова бара пракса и огромно трпение. Слушањето се пренесува и на околината – слушајте сè околу вас и вашето дете: глетки, мириси, звуци.
- Прифаќање без осудување
Ова значи дека кон секоја ситуација пристапувате без да ги осудувате сопствените чувства или чувствата на вашето дете. Тоа значи и дека заборавате на нереалните очекувања од вашето дете. Тоа е „прифаќање на она што е“, и тоа е вашата цел.
- Емоционална свест
Детето го гледа и чувствува она што го прави родителот, затоа обликувањето на емоционалната свест е клучно за вашето дете да научи да го прави истото. Секогаш ќе постојат емоции кои влијаат на секоја ситуација, без разлика дали се тоа длабоки долгогодишни или минливи емоции.
- Саморегулација
Ова значи да не дозволите вашите емоции да предизвикаат моментални реакции, како што се викање или некое друго автоматско однесување. Со други зборови, размислете пред да дејствувате за да избегнете пресилна и претера реакција.
- Сочувство
Можеби не се согласувате со постапките или мислите на вашето дете, но свесното родителство ги поттикнува родителите да бидат посочувствителни. Ова вклучува емпатија и разбирање на положбата на детето во даден момент.
