Втората бременост за многу жени доаѓа со помалку неизвесност, но и со многу прашања. Иако секоја бременост е различна, телото веќе има „искуство“ од првиот пат, што влијае на текот на бременоста и породувањето. Жените често забележуваат дека симптомите се поинакви, дека се чувствуваат посигурни, но и дека сè се случува побрзо отколку првиот пат. Од траењето на бременоста, преку интензитетот на трудовите, па сè до закрепнувањето по породувањето – разликите не се занемарливи. Науката има објаснување за овие промени, поврзани со хормоните, мускулите и адаптацијата на организмот. Иако не постои правило што важи за сите, статистиката покажува одредени трендови кај второто раѓање. Токму тие сознанија можат да им помогнат на идните мајки подобро да се подготват. Еве што најчесто се разликува кај втората бременост и породување.
Втората бременост просечно трае пократко
Бременоста вообичаено трае околу 40 недели, а нејзиниот почеток се пресметува од првиот ден на последниот менструален циклус. Кај првата бременост, времетраењето во просек е околу 41 недела и три дена, што е приближно десет дена подолго. Кај втората бременост, пак, просечното траење е околу 40 недели и три дена.
Причината за ова е тоа што телото веќе поминало низ една бременост и „знае“ како да реагира. Хормоналните процеси се активираат побрзо, а организмот полесно се прилагодува на промените, што често резултира со пократка бременост.
Второто породување најчесто е покусо
Додека првото породување во просек трае околу 18 часа, второто обично поминува значително побрзо – најчесто околу осум часа. Секако, ова варира од жена до жена, но кај мнозинството, второто породување е пократко и поефикасно.
За време на првата бременост и породување, лигаментите и ткивата веќе се опуштиле и растегнале. Тоа овозможува, при второто породување, бебето полесно и побрзо да помине низ породилниот канал.
Трудовите доаѓаат побрзо и се поинтензивни
Мускулите и лигаментите во карлицата и вагината веќе еднаш создале простор за бебе, поради што вториот пат процесот се одвива побрзо. Трудовите често доаѓаат нагло и со пократки интервали, па лекарите советуваат жените да не чекаат долго пред да заминат во породилиште.
Грчевите по породувањето се поизразени
Во првите три до пет дена по породувањето, нормално е жената да чувствува грчеви во матката, особено кога бебето цица. Тогаш телото ослободува окситоцин – хормон кој помага матката да се собира и да се врати на големината што ја имала пред бременоста.
Овие грчеви се слични на менструални болки и кај некои жени можат да бидат поизразени при второто породување, токму затоа што матката се собира поефикасно и побрзо.
