Дали во 5 до 12 е можна промена на одлуката на Владата донесена на 7-та редовна седница одржана на 26.01.2022 година за започнување на наставата со физичко присуство од 1-ви февруари?
Со оглед на тековната состојба на заболени од вирусот корона SARS-CoV-2, сите панелисти се согласуваат дека е неопходно да се размисли дали започнувањето на наставата со физичко присуство е најсоодветниот начин на продолжување на наставата или е подобро да се започне барем две седмици подоцна или онлајн
Во пресрет на почетокот на второто полугодие од учебната 2021/2022 година, експертите гласно апелираат да се преиспита донесената одлука со оглед на актуелната епидемиолошка состојба предизвикана од коронавирусот SARS-CoV-2. Нивниот заеднички став произлезе од заклучоците на јавната дебата организирана од Првата детска амбасада во светот „Меѓаши“, која на едно место собра врвни експерти во својата област кои дадоа стручни одговори и објаснувања околу Ковид-19 и децата.
Темата на јавната дискусија беше „Најдобар интерес за децата – за и против носењето маски и тестирањето во училиштата“, а на неа дискутираа: д-р Мими Кимовска-Христов од Универзитетската детска клиника, д-р Злате Мехмедовиќ од Здравствениот дом Скопје, д-р Бесник Зеќири од Институтот за белодробни заболувања кај децата „Козле“, проф. д-р Никола Пановски од Медицинскиот факултет при УКИМ и Ана Попризова, училишен психолог.
Дел од заклучоците од дебатата се следните:
- Бројот на заболени деца што се јавиле во Институтот за белодробни заболувања кај децата во периодот крајот на декември 2021 – почетокот на втората половина на јануари 2022, е двојно зголемен од вообичаениот број за време на најголемите пикови во претходните бранови;
- Со оглед на тековната состојба на заболени од вирусот корона SARS-CoV-2, сите панелисти се согласија дека е неопходно да се размисли дали започнувањето на наставата со физичко присуство е најсоодветниот начин на продолжување на наставата или е подобро да се започне барем две седмици подоцна или онлајн;
- Ставовите на мнозинството од панелистите околу носењето маски е дека треба да се носат во затворени простории, а сите се против задолжително носење маски на отворено и дека е пожелно да се прават тестирања еднаш неделно во училиштата (како што предложи проф. д-р Пановски, а училишниот психолог истакна дека постоењето барем на определен број комплети за брзо тестирање би им помогнало многу во одредени ситуации во училиштата кога ќе се појави случај на ученик или наставник да не се чувствува добро и да знаат што да преземат). Маските штитат повеќекратно и не само од Ковид-19.
„Врз основа на заклучоците, особено едногласноста на панелистите за проблематичноста на одлуката за започнување на наставата со физичко присуство од 1-ви февруари, цврсто веруваме дека оваа одлука треба да биде преиспитана во насока на започнување на полугодието со онлајн настава, најмалку за две седмици од февруари, а потоа да се одлучи повторно за евентуално продолжување одреден период, следејќи ја актуелната епидемиолошка состојба. Меѓу другото, сметаме дека е добро Владата да размисли за брзо реагирање и обезбедување на сите училишта – основни и средни со брзи тестови, онака како што и голем дел држави веќе подолго време практикуваат. Веруваме дека и приватниот сектор (особено фармацевтскиот) би можел да излезе пресрет и да го заштити јавното или колективното здравје доколку им се обрати Владата“, се вели во дописот од „Меѓаши“, кој е доставен и како конкретно Барање до Владата и Комисија за заразни болести – Министерство за здравство.
